რა მოხდა: მოქალაქე, ლაშა ჟღენტი და მისი ოჯახი სამართალდამცველებს ძალადობაში ადანაშაულებს.

• ჟღენტის თქმით, 20 ივლისს, თბილისში, გოგებაშვილის ქუჩაზე, პოლიციელებმა გააჩერეს და გაჩხრიკეს, რა დროსაც მასზე იძალადეს.
• კადრებში ჩანს, რომ კაცს სხეულზე დაზიანებები აქვს.
• "ერთ-ერთმა მანქანაში მცემა, ერთი საჭესთან იჯდა, რომელსაც მივყავდი, მეორე მირტყამდა მანქანაში", — ამბობდა მოქალაქე ფორმულასთან.
• მისივე თქმით, პოლიციელი, რომელიც საჭესთან იჯდა, აგინებდა და თან ემუქრებოდა: "[მეუბნებოდა], რომ ჩემნაირი ბევრი ჰყავს ჩასმული ციხეში".
• ლაშა ჟღენტის დედის მიმართვის საფუძველზე, სპეციალურ საგამოძიებო სამსახურში გამოძიება სამსახურებრივი უფლებამოსილების გადამეტების ფაქტზე მიმდინარეობდა.

უწყების განცხადებით, მოიპოვეს ინციდენტის ამსახველი ვიდეოკამერის ჩანაწერები და ფაქტის შემსწრე მოწმეები გამოჰკითხეს.

• საგამოძიებოში ამბობენ, რომ მოწმეებს სამართალდამცველების მხრიდან ძალადობის ფაქტი არ დაუნახავთ.
• "მამაკაცი პოლიციელებს შემოწმების სრულყოფილად ჩატარების შესაძლებლობას არ აძლევს და მათ წინააღმდეგობას უწევს, რის შემდეგაც სამართალდამცველები მის დაკავებას იწყებენ და ავტომანქანისკენ მიჰყავთ. პოლიციელებს დაკავებულის გადაყვანასა და ავტომანქანის დაძვრაში ხელს უშლის ადგილზე მოსული ასაკოვანი ქალბატონი, რომელიც პოლიციელებთან ფიზიკურ კონტაქტში შედის. მოქალაქეების შეჩერებიდან დაახლოებით 7-8 წუთში პოლიციის ავტომანქანა შემთხვევის ადგილს ტოვებს. აღნიშნულ ვიდეოჩანაწერში პოლიციის თანამშრომელთა მხრიდან ფიზიკური ძალადობის ფაქტი არ ფიქსირდება", — ვკითხულობთ განცხადებაში.
• პოლიციელების მტკიცებით, ლაშა ჟღენტმა დათვალიერების პროცესში მათ წინააღმდეგობა გაუწია და სიტყვიერი შეურაცხყოფა მიაყენა.
• "დაკავებისას და ავტომანქანაში ჩასმისას მისი თანმხლები პირები, ასევე, შემდგომში ადგილზე მოსული ჟღენტის ბებია, გულნაზი ჟღენტი წინააღმდეგობას უწევდნენ პოლიციის თანამშრომლებს. მათ შორის, გულნაზი ჟღენტი დაჯდა პოლიციის ავტომანქანის საჭესთან და არ აძლევდა მათ ადგილიდან დაკავებული პირის წაყვანის შესაძლებლობას", — ნათქვამია განცხადებაში.

საგამოძიებოში ამბობენ, რომ ამ ეტაპზე მიღებული არ არის ექსპერტიზის დასკვნები, რომლებიც ჟღენტსა და მის ბებიას სხეულზე არსებული დაზიანებების გამო ჩაუტარდათ.

• "მტკიცებულებები, რომელიც ამ დროისთვის არის მოპოვებული, არ იძლევა სამართალდამცავების მხილების და მათი პასუხისმგებლობის დაყენების საფუძველს", — წერენ ისინი.