რატომ არის მნიშვნელოვანი: უკრაინული მედიის ცნობით, ვოლოდიმირ ზელენსკიმ თანამდებობიდან გაათავისუფლა ელჩი დიდი ბრიტანეთში, ვადიმ პისტაიკო, რომელმაც უკრაინის პრეზიდენტის განცხადებას "არაჯანსაღი სარკაზმი" უწოდა.

  • ზელენსკის ბრძანებაში ნათქვამია, რომ პრისტაიკო გათავისუფლებულია როგორც ელჩის, ასევე, საერთაშორისო საზღვაო ორგანიზაციაში მუდმივი წარმომადგენლის პოზიციიდან.

რა მოხდა: ბრიტანეთის თავდაცვის უწყების ხელმძღვანელმა, ბენ უოლესმა ნატოს სამიტზე უკრაინას მოუწოდა, მეტი მადლიერება გამოეხატა პარტნიორების მიმართ გაწეული სამხედრო მხარდაჭერისთვის.

  • მისივე თქმით, ბრიტანეთი არ არის ამაზონის ონლაინ მაღაზია იარაღისთვის.
  • საპასუხოდ, ზელენსკიმ განაცხადა, რომ უკრაინა ყოველთვის მადლიერია დიდი ბრიტანეთის მიერ გაწეული დახმარებისთვის.
  • "შეგვიძლია, ყოველ დილით გაღვიძებისას მადლობა ვუთხრათ პირადად მინისტრს. ბრიტანეთი ჩვენი პარტნიორია, ჩვენ მათი მადლიერები ვართ. შესაძლოა, მინისტრს რამე განსაკუთრებული სურს", — თქვა მან.
  • სწორედ ზელენსკის ამ ფრაზას უწოდა პრისტაიკომ "არაჯანსაღი სარკაზმი".