ევროპული საქართველოს წევრისა და მერობის კანდიდატის, ელენე ხოშტარიას თქმით, ვენეციის კომისიის პრეზიდენტის განცხადებებმა აჩვენა, რომ საკონსტიტუციო რეფორმის პროცესი ჩიხშია შესული:

"ხელისუფლების ერთადერთი არგუმენტი, თითქოს მათ გააჩნიათ მხარდაჭერა ვენეციის კომისიიდან, გაქარწყლდა და ჩვენ ვხედავთ, რომ როგორც ქვეყნის შიგნით, ისე მის გარეთ ყველას აქვს მოლოდინი, რომ ამ ჩიხური სიტუაციიდან გამოვიდეს ჩვენი ქვეყანა. ჩვენ კიდევ ერთხელ ვთავაზობთ ხელისუფლებას, რომ მივმართოთ ერთადერთ, ნორმალურ, საღ გამოსავალს, რაც არის პლებისციტი. ვკითხოთ ხალხს, თუ როგორი უნდა იყოს ჩვენი საარჩევნო სისტემა და როგორ უნდა გადაწყდეს პრეზიდენტის არჩევითობის საკითხი. როგორც იცით, 154 ათასი ხელმოწერა არსებობს, რომელიც მოკლე დროში შევაგროვეთ, სადაც ადამიანებს დაეკითხონ ქვეყნის მოწყობის საკითხები. სამწუხაროდ, ვერ შედგა კონსენსუსი ხელისუფლების ძალიან ჯიუტი და არაგონივრული პოზიციის გამო. ასევე, ვერ შედგა კონსენსუსი პოლიტიკურ ძალებს და საზოგადოებრივ ჯგუფებს შორის. დღეს ჩვენ მივიღეთ ძალიან მძიმე კრიტიკა მნიშვნელოვანი საერთაშორისო პარტნიორების მხრიდან. ვთავაზობთ ხელისუფლებას, რომ ადგილობრივი თვითმმართველობის არჩევნებზე დაინიშნოს პლებისციტი, სადაც გადაწყდება პრეზიდენტის არჩევითობის და საარჩევნო სისტემის საკითხი".

საქართველოს პარლამენტმა 23 ივნისს მეორე მოსმენით მიიღო საკონსტიტუციო ცვლილებების პროექტი, რომელსაც კრიტიკულად აფასებს როგორც არასამთავრობო სექტორი, ისე - ოპოზიცია. საკონსტიტუციო რეფორმის პროცესი გააკრიტიკა ვენეციის კომისიის პრეზიდენტმა, ჯანი ბუკიკიომაც. მისი თქმით, კონსტიტუციას, რომელიც ერთი პარტიის მიერაა დამტკიცებული, არ აქვს სრული ლეგიტიმაცია.