ქიბარ ხალვაშის ადვოკატი პაატა სალია სააპელაციო საჩივრის გაუქმებას საკმარისი მტკიცებულებების არქონით განმარტავს. მისი თქმით, ისევე როგორც პირველი ინსტანციის სასამართლოში, ასევე სააპელაციოშიც, არ მოხდა მოწმეთა დაკითხვა და გარკვეული მტკიცებულებების წარმოსადგენად ვადის განსაზღვრა:

"პირველი ინსტანციის გადაწყვეტილებით, ეს არ დაკმაყოფილდა. შესაბამისად, ჩვენ შემოვიტანეთ სააპელაციო საჩივრები. ჩემი პოზიცია იყო პირადად და ჩემს მარწმუნებელსაც ვესაუბრე ამის შესახებ, რომ ჩვენ არ გვქონდა საკმარისი მტკიცებულებები იმისთვის, რომ გვემტკიცებინა, შესაბამისად მე ვერ ვხედავდი პერსპექტივას".

სააპელაციო საჩივარის მიხედვით, ქიბარ ხალვაში ითხოვდა რუსთავი 2-ის ლოგოზე საავტორო უფლებებსა და ზიანის - 18 მილიონი ლარის ანაზღაურებას. აღნიშნული მოთხოვნა მას საქალაქო სასამართლომ არ დაუკმაყოფილა.

თბილისის სააპელაციო სასამართლოში დღეს, 7 მაისს, 10:00 საათზე განახლდა რუსთავი 2-ის საქმის განხილვა.

გიორგი და ლევან ყარამანიშვილების ადვოკატის, ზაზა ბიბილაშვილის განცხადებით, სავარაუდოდ დღეს დასრულდება პროცესი, ხოლო გადაწყვეტილებას ხვალ გამოაცხადებენ.