ნინო სალუქვაძე — პირველი ქალი სპორტსმენი, რომელიც მე-10 ოლიმპიადაზე იასპარეზებს
![](http://chandler.on.ge/2023/07/19/_MG_6540.jpg)
ფოტო: საქართველოს ბანკი
2024 წლის ზაფხულის ოლიმპიურ თამაშებზე, პარიზში, მიზანში მსროლელი ნინო სალუქვაძე იასპარეზებს. ქართველი ჩემპიონისთვის ეს რიგით მე-10 ოლიმპიური თამაშია. გარდა ოლიმპიურ შეჯიბრებზე მოპოვებული მედლებისა და წარმატებისა, ნინო სალუქვაძე რეკორდსმენიც გახდა — ის პირველი ქალია, რომელმაც ოლიმპიურ თამაშებში 9-ჯერ მიიღო მონაწილეობა.
გზა მიზანში სროლამდე
ნინო სალუქვაძემ პირველად 1988 წელს სეულში გამართულ ოლიმპიურ თამაშებში მიიღო მონაწილეობა და 25 მეტრიდან ტყვიის სროლაში ოქროს მედალიც მოიპოვა. ეს გამარჯვება დიდი შრომის, მანამდე კი იმ გადაწყვეტილების შედეგი იყო, რომელმაც ნინოს სამომავლო კარიერა ბავშვობიდან განსაზღვრა.
ნინოს ბავშვობაში კალათბურთის თამაში სურდა და მშობლებიც მხარს უჭერდნენ, თუმცა სიმაღლის გამო მწვრთნელმა ის გუნდში არ აიყვანა. ამის შემდეგ ნინომ მუსიკის გაკვეთილებზე დაიწყო სიარული, თუმცა ისიც და მშობლებიც ხვდებოდნენ, რომ ბავშვს სხვა ინტერესები ჰქონდა. მოგვიანებით, ნინოს მამამ — ვახტანგ სალუქვაძემ, რომელიც მიზანში სროლის მწვრთნელია, გადაწყვიტა, რომ შვილისთვის რამდენიმე გაკვეთილი ჩაეტარებინა. ნინო თითოეულ ვარჯიშს დიდი მონდომებითა და ინტერესით ესწრებოდა და შედეგმაც არ დააყოვნა: მიზანში პირველად სროლის შემდეგ აშკარა იყო, რომ ნინოს დიდი მომავალი ჰქონდა.
კარიერული მიღწევები
2024 წელს ნინო სალუქვაძე ზედიზედ მე-10 ოლიმპიურ თამაშში იასპარეზებს. ლეგენდარული ქართველი ჩემპიონი მსოფლიომ 1988 წლის თამაშებიდანვე გაიცნო, როცა ნინომ ოქროს მედალთან ერთად 10 მეტრიდან ტყვიის სროლაში ვერცხლის მედალიც მოიპოვა. 2008 წელს პეკინში გამართულ ოლიმპიურ თამაშებზე, რომელიც ნინოსთვის რიგით მე-6 იყო, ქართველმა ჩემპიონმა ბრინჯაოს მედალი მოიპოვა.
სამგზის ოლიმპიური მედლის მფლობელი და 9 ოლიმპიური თამაშის მონაწილე, ნინო სალუქვაძე, ასევე მრავალგზის ევროპისა და მსოფლიოს ჩემპიონია. თავისი კარიერის განმავლობაში ნინო სალუქვაძემ მსოფლიო რეკორდები 20-ჯერ დაამყარა, ხოლო მიზანში სროლის მსოფლიო ჩემპიონატი 7-ჯერ მოიგო. რაც შეეხება თასის გათამაშებებს, ქართველი ჩემპიონი მსოფლიო თასების გათამაშების 17-გზის გამარჯვებულია, მსოფლიო სუპერ თასის გათამაშების კი 9-გზის მფლობელი.
![](http://chandler.on.ge/2023/07/19/1689763310_64b7be08093fb.jpg)
ფოტო: Alamy
ნინო სალუქვაძე ტყვიის მსროლელთა ქალთა ეროვნული ნაკრების ლიდერია და საქართველოს სახელით არაერთ შეჯიბრში ასპარეზობს. როგორც ნინომ აღნიშნა, მისი წარმატებები საქართველოსთვისაა მნიშვნელოვანი და 2024 წლის ოლიმპიადის შესახებ შემდეგი კომენტარი გააკეთა:
"ეს ჩემთვის კი არა, ჩემი ქვეყნისთვისაა მნიშვნელოვანი. საქართველო ძალიან პატარა ქვეყანაა და მსოფლიო მოსახლეობის ალბათ 80%-მა არც კი იცის, სად მდებარეობს ის. ასე რომ, თუ ამას მივაღწევ, იქნებ ჩემს პატარა, უმშვენიერეს სამშობლოზე შეიტყონ", — განაცხადა ნინო სალუქვაძემ.
მიზანში მსროლელი დედა-შვილი
ბავშვობაში ნინო სალუქვაძის მწვრთნელი მისი მამა, ვახტანგ სალუქვაძე იყო, თუმცა მიზანში სროლა არც ოჯახის სხვა წევრისთვისაა უცხო. ნინოს შვილი, ცოტნე მაჭავარიანი, დედის კვალს მიჰყვება და ტყვიის მსროლელთა ვაჟთა ნაკრების წევრია. ხორვატიის ქალაქ ოსეკში გამართულ გრან პრიზე ვაჟთა ნაკრებმა ბრინჯაოს მედალი მოიპოვა.
ოლიმპიადაზე გამოჩენისას დედის მსგავსად საზოგადოების ყურადღება ცოტნე მაჭავარიანმაც მიიპყრო. 2016 წლის რიო-დე-ჟანეიროს თამაშებზე ნინო და ცოტნე პირველი დედა-შვილი გახდა, რომელმაც ოლიმპიადაზე ერთად იასპარეზა. რაც შეეხება 2024 წლის ოლიმპიურ თამაშებს, ნინო სალუქვაძის თქმით, მონაწილეობისკენ მამამ და ცოტნემ უბიძგეს.
ასე რომ, მრავალგზის ჩემპიონ ნინო სალუქვაძეს წინ კიდევ ერთი ოლიმპიური თამაში ელის. როგორც ქართველი სპორტსმენი ქალი აღნიშნავს, მიზანში სროლისთვის ასაკს მნიშვნელობა არ აქვს.
"ფიზიკურად დიდი მომზადება არ გჭირდება, უბრალოდ, ხელში პისტოლეტი უნდა დაიკავო. ჩვენი სპორტი უმეტესწილად ფსიქოლოგიური გამოცდაა, საკუთარი აზრების კონტროლი უნდა შეძლო", — დასძინა ნინო სალუქვაძემ.
2024 წლის ოლიმპიური თამაშები, სადაც ნინო სალუქვაძე მეათედ იასპარეზებს, 26 ივლისს გაიხსნება. თამაშები 15 დღის განმავლობაში გაგრძელდება, მონაწილეები კი ერთმანეთს 329 სპორტის 32 სახეობაში შეეჯიბრებიან.
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
კომენტარები