რა ხდება: თავდაპირველად ინფორმაცია, რომ მიტროპოლიტი და პატრიარქის მოსაყდრე შიო მუჯირი მოწამლეს, მთავარმა არხმა და რუსთავი 2-მა გაავრცელეს.

  • მთავარ არხთან გუშინ, 5 ივლისს თეოლოგი ლევან ტატურაშვილი ამბობდა, რომ მეუფე შიომ მსახურების შემდეგ თავი შეუძლოდ იგრძნო, მიმართა ექიმებს, ჩაუტარდა გამოკვლევა და სისხლში დარიშხანი აღმოჩნდა.
  • მისივე თქმით, "სახელმწიფომ და საპატრიარქომ გადაწყვიტეს, რომ ეს ამბავი დაფარული და გასაიდუმლოებული ყოფილიყო".
  • "ღამის საათებში ანზორ ჩუბინიძის უშუალო ხელმძღვანელობით ისინი მიდიან სამების ცენტრალურ საკურთხეველში და ატარებენ კვლევებს, რომ აღმოეჩინათ ამა თუ იმ ლიტურგიკულ ნივთზე აღმოჩნდებოდა თუ არა დარიშხანის კვალი".
  • ტატურაშვილის განცხადებით, შეამოწმეს მეუფის პირადი ნივთები და, როგორც ჩანს, მისი მოწამვლის ადგილმდებარეობა დადგინდა.
  • "მე მაქვს ინფორმაცია, რომ ეს იყო სამების საკათედრო ტაძრის საკურთხეველი და დღეს უკვე არავინ მალავს ინფორმაციას, რომ მოსაყდრე შიო მოწამლულია", — ამბობს ის მთავართან.

გარდა ამისა, რუსთავის 2-ის დღეს გავრცელებულ ინფორმაციაში საუბარია იმაზე, რომ ბოლო თვის განმავლობაში მეუფე შიო მართლაც შეუძლოდ გრძნობდა თავს, განსაკუთრებით მძიმედ კი ერთი კვირის წინ იყო.

  • ასევე, ამბობენ, რომ აქვთ "უტყუარი ინფორმაცია," რომ კვლევების შედეგად ანალიზებში არაერთი საეჭვო ნივთიერება აღმოჩნდა.
  • "ჩვენი ინფორმაციით, საპატრიარქოში ეჭვობენ, რომ დროთა პატრიარქის თანამოსაყდრეს დროთა განმავლობაში, ეტაპობრივად წამლავდნენ".

რას ამბობენ საპატრიარქოში: ჯერჯერობით იქ ოფიციალური კომენტარი არ გაკეთებულა.

  • საპატრიარქოს საზოგადოებასთან ურთიერთობის სამსახურის ხელმძღვანელმა ანდრია ჯაღმაიძემ დაპოსტა, რომ მეუფე შიოზე გავრცელებულ ინფორმაციაზე კომენტარს მოგვიანებით გააკეთებს.
  • რუსთავი 2-თან ისაუბრა იღუმენმა გაბრიელმა. მისი თქმით, მეუფისთვის ცუდად ყოფნა არ შეუმჩნევია.
  • "მერე გავიგე, რომ შეუძლოდ იგრძნო თავიო და შესაბამისად, აუღეს ანალიზები. საქართველოში ჩაუტარდა ანალიზები", — ამბობს ის.
  • არხთან სატელეფონო ინტერვიუში პატრიარქის ექიმი, ცისანა შარტავა აცხადებს, რომ მეუფე ახლა თავს კარგად გრძნობს.
  • "ვიცი, რომ კარგად ბრძანდება ახლა და დანარჩენი, ამაზე გაკეთდება, ალბათ, განცხადება", — ამბობს ექიმი.