რატომ არის მნიშვნელოვანი: 3 ივლისს უკრაინის პრეზიდენტმა განკარგულება გასცა, საგარეო უწყებას დაებარებინა საქართველოს ელჩი, რათა მან 48 საათის განმავლობაში უკრაინა დატოვოს და თბილისში სააკაშვილის საკითხზე კონსულტაციები გამართოს.

  • ვოლოდიმირ ზელენსკის განცხადებით, რუსეთი საქართველოს მთავრობის ხელით უკრაინის მოქალაქეს კლავს.
  • "მოვუწოდებ ჩვენს პარტნიორებს, მოაგვარონ ეს სიტუაცია, არ უგულებელყონ საკითხი და გადაარჩინონ ეს ადამიანი. ევროპაში არცერთ მთავრობას არ აქვს სიკვდილით დასჯის უფლება, სიცოცხლე ძირითადი ევროპული ღირებულებაა", — თქვა მან.

უკრაინის საგარეო უწყებაში ამბობენ, რომ ელჩ გიორგი ზაქარაშვილთან მწვავე პროტესტი გამოხატეს პატიმრობაში მყოფი უკრაინის მოქალაქის, მიხეილ სააკაშვილის მდგომარეობის გაუარესების გამო.

  • ასევე, შესთავაზეს თბილისში დაბრუნება, რათა გამართოს კონსულტაციები "არსებული სიტუაციის მოსაგვარებლად გზების მოსაძებნად".
  • "ქართველ დიპლომატთან ხაზი გაესვა, რომ მიხეილ სააკაშვილის მიმართ ასეთი დამოკიდებულება აბსოლუტურად მიუღებელია. საქართველოს ხელისუფლებამ უნდა შეწყვიტოს უკრაინის მოქალაქის მიმართ ძალადობა", — ნათქვამია განცხადებაში.
  • საგარეო საქმეთა სამინისტროს ცნობით, უკრაინა მზადაა, სასწრაფოდ განიხილოს სააკაშვილის სამკურნალოდ და სამედიცინო დახმარების მიზნით გადაყვანის საკითხი.