ფლორიდის ერთ-ერთ სახანძრო სადგურზე დატოვებული ახალშობილი მეხანძრემ იშვილა. მისი თქმით, ღამის ცვლაში მუშაობისას დაახლოებით 2 საათზე განგაში გაიგონა, რომელიც იტყობინებოდა, რომ სადგურის Safe Haven Baby Box-ში პირველი ახალშობილი დატოვეს.

Safe Haven Baby Box აშშ-ს სამაშველო სადგურებზე 2020 წლიდან ფუნქციონირებს და იმისთვისაა შექმნილი, რომ მათ, ვისაც ბავშვის მოვლა არ შეუძლიათ, ისინი უსაფრთხოდ და ანონიმურად დატოვონ.

მეხანძრემ, რომელმაც ანონიმურად დარჩენა ამჯობინა, თავიდან ჩათვალა, რომ სადგურზე ცრუ განგაში იყო, თუმცა შემდეგ ყუთში ვარდისფერ საბანში გახვეული ბავშვი იპოვა.

"ხელში პატარა ბოთლი ეჭირა და თავისთვის იწვა, არ ტიროდა. ამოვიყვანე და დავარწიე, მაგ მომენტის შემდეგ მიყვარს", — აღნიშნავს ის.

მეხანძრე ჰყვება, რომ მას და მის ცოლს ბავშვი 10 წელზე მეტია უნდათ და შვილად აყვანის რიგშიც იდგნენ, ამიტომ, როდესაც ახალშობილი საავადმყოფოში დატოვა, თან წერილიც დაურთო, სადაც ითხოვდა, ბავშვი მისთვის მიეშვილებინათ. წერილში, რომელიც ბავშვის საბანში დატოვა, მეხანძრემ მისი და მისი ცოლის ისტორია და კოორდინატები ჩაწერა. მისი თქმით, მეუღლისთვის მაშინვე არ დაურეკავს, რადგან გვიან იყო, თუმცა იცოდა, რომ დასთანხმდებოდა.

"დავწერე, რომ შვილად აყვანის ოფიციალურ რიგში ვიდექით, ერთადერთი, რაც გვჭირდებოდა, ბავშვი იყო", — ამბობს მეხანძრე.

ის იმასაც ჰყვება, როგორ მოუყვა ცოლს მომხდარის შესახებ და იხსენებს, როგორ დაიწყო ქალმა ტირილი.

"ყველაზე მეტად რისაც მეშინოდა, ის იყო, რომ წერილი, რომელიც დავტოვე, სადმე დაიკარგებოდა და ბავშვს წაიყვანდნენ. ძალიან სტრესული რამდენიმე დღე იყო", — აღნიშნავს ის.

ოჯახს ბავშვი 2 დღის შემდეგ მიუყვანეს და მათთან რამდენიმე თვის განმავლობაში ცხოვრობდა, სანამ ოფიციალურად აიყვანდნენ. მეხანძრის თქმით, მისთვის ჯერ კიდევ დაუჯერებელია, როგორ იპოვა შვილი, რომელსაც წყვილმა ზოი დაარქვა.

"ვიცით, რომ ეს ბავშვი მის ოჯახს ძალიან ეყვარება და გახარებულები ვართ, რომ ახალშობილებს მიტოვებისგან ვიცავთ", — ამბობს Safe Haven Baby Boxes-ის დამფუძნებელი მონიკა კელსი.

დღესდღეობით აშშ-ში სულ მსგავსი 148 Safe Haven Baby Box მოქმედებს და მისი წყალობით უსაფრთხო თავშესაფარი დაახლოებით 31-მა ბავშვმა მიიღო.