ლგბტქი ასოციაცია - თემიდა რამდენიმე დღეა კავკასუს ონლაინისგან უშედეგოდ ელის დომეინის – Intersex.ge-ს რეგისტრაციას. როგორც თემიდას აღმასრულებელი დირექტორი, კობა ბიწაძე ამბობს, ორგანიზაციამ დომეინის რეგოსტრაციაზე განაცხადი 25 ივნისს გააკეთა:

"მეილზე მოვიდა პასუხი, რომ ორი2 სამუშაო დღის განმავლობაში მივიღებდით შეტყობინებას დომენის სახელის ვალიდაციის შესახებ ანუ, მაქსიმუმ გუშინ (27 ივნისს) უნდა ყოფილიყო. დღეს დავრეკეთ და ოპერატორი გვეუბნება რომ მეილზე მიიღებთ პასუხს, მაგრამ ცენზურის გამო, შეიძლება, არ დაგირეგისტრირონო. ველოდეთ პასუხს".

კობა ბიწაძე ფეისბუკზე გამოქვეყნებულ სტატუსში ასევე წერს, რომ მათ დღეს კიდევ დარეკეს კავკაზუს ონლაინში, მაგრამ რადგან სამუშაო საათები დასრულდა, პასუხის გაცემას დილისთვის დაჰპირდნენ.

"გაფრთხილებთ: ცენზურის გამო უარი რომ მოგვივიდეს, მივმართავთ სასამართლოს! დასერჩეთ მაინც, რას ნიშნავს ინტერსექსი! პასუხის დაგვიანებაზეც არ ვაპირებთ თვალის დახუჭვას და ბარემ ცენზურაც მიუმატეთ, რომ ერთიანად მოვამზადოთ სარჩელი", - აცხადებს თემიდას აღმასრულებელი დირექტორი.

როგორც კობა ბიწაძემ On.ge-ს უთხრა, საიტი Intersex.ge იქნება ინტერსექს ადამიანთა შესახებ. მისივე თქმით, საიტი შემეცნებითი ხასიათის იქნება:

"ამ თემაზე ქართულად მხოლოდ რამდენიმე სტატიას თუ წააწყდები ინტერნეტში. სამედიცინო უნივერსიტეტში კი შეისწავლიან ამ თემას, მაგრამ იქ მოძველებულ ტერმინს - ჰერმაფროდიტს იყენებენ და ძველი მიდგომებით ხელმძღვანელობენ. ჩვენს საიტზე კი თავს ვუყრით ახალ ინფორმაციას ინტერსექს ადამიანთა პრობლემებზე, გამოწვევებზე, მაგალითად, იქნება სტატიები იმის შესახებ თუ რატომ უკეთებენ ექიმები ინტერსექს ბავშვებს და ჩვილებს ხშირად არასაჭირო ოპერაციებს, ინტერსექსთა რა ვარიაციები არსებობს და ა.შ."

ინტერსექსი ნიშნავს პირს, რომელსაც ორივე სქესისათვის დამახასიათებელი ანატომიური ნიშან-თვისებები გააჩნია.

On.ge შეეცდება გაარკვიოს, რა მიზეზით აფერხებს კავკასუს ონლაინი დომეინის, Intersex.ge-ს რეგისტრაციას.