თბილისის მერიაში ამბობენ, რომ ზაჰესის ხიდი, რომელის რეაბილიტაციაც რამდენიმე თვის წინ დასრულდა არ ჩანგრეულა. მერიის ინფორმაციით, პოლიტიკურმა პარტიებმა ცრუ ინფორმაცია გაავრცელეს, და რეალურად, ხიდამდე მისასვლელი გზა დაზიანდა.

"ზაჰესის ხიდის მშენებლობის დასრულებიდან გარკვეული პერიოდის შემდეგ ძლიერი წვიმისა და უხვი ნალექის შედეგად ხიდთან მისასვლელი გზის სავალი ნაწილი დაზიანდა და არა თავად ხიდი, კერძოდ, ღვარცოფმა გაარღვია ჯებირი და ჩამოშალა მიწა," - ამბობენ მერიაში და განმარტავენ, რომ ხიდთან მისასვლელი გზის აღსადგენად სამუშაოები დაწყებულია.

16 ივნისს სტუდია მონიტორმა მასალა გაავრცელა, რომლის მიხედვითაც, ხიდის მშენებლობა დაახლოებით ორი თვის წინ დასრულდა და მისი რეაბილიტაცია ოთხი მილიონი ლარი დაჯდა. ამავე ორგანიზაციის მიერ მომზადებული მასალის მიხედვით, მერიამ ზაჰესის ხიდი ტექნიკური შემოწმების გარეშე გახსნა.