ოჰაიოელმა 66 წლის გეილ როჯერსმა გადაწყვიტა, რომ ასაკი ახალი პროფესიის დაუფლებაში ხელს ვერ შეუშლიდა, როდესაც დაინახა, რომ მის ქალაქში საცურაო აუზი მაშველის არყოლის გამო ვერ იხსნებოდა. ყოფილმა IT კონსულტანტმა და ასევე ქალაქის გამგეობის პრეზიდენტმა გადაწყვიტა, სამეზობლოს პრობლემა თავადვე გადაეჭრა და ეს საქმე საკუთარ თავზე აიღო.

"ვიფიქრე, 60-იან წლებში მაშველობასთან დაკავშირებული ტრენინგები გავლილი მაქვს, იქნებ, ახლაც გამომივიდეს-მეთქი", — ამბობს ბებია როჯერსი Good Morning America-სთან.

მართალია, გეილს ახალგაზრდობაში სამაშველო წვრთნები გავლილი ჰქონდა, თუმცა ამ პროფესიით არასდროს უმუშავია, ამიტომ უნარების დახვეწა არ აწყენდა. 3 შვილიშვილის ბებიამ საკმაოდ რთული ფიზიკური გამოცდა ჩააბარა და სრული წვრთნაც გაიარა, რის შემდეგაც აუზის მაშველად ოფიციალურად დანიშნეს.

"ახლა ყველაფერი რადიკალურად განსხვავებულია. ჩემ დროს მაშველი დიდად არაფერს აკეთებდა, მხოლოდ სკამზე იჯდა, ერთი-ორჯერ სასტვენს თუ ჩაბერავდა ან გეტყოდა, სირბილი შეწყვიტეო. არც სპეციალური საცურაო კამერა ჰქონდათ, არც გასაბერი ჟილეტები, მხოლოდ სასტვენი. ასე რომ, უფრო პოლიციის როლს ასრულებდნენ, სხვა არაფრის", — აღნიშნავს როჯერსი.

აუზის მენეჯმენტის პრეზიდენტი, ჯეფ ბლუმი ამბობს, რომ ამ ასაკის ადამიანები სამსახურის დასაწყებად იშვიათად მიმართავენ, ამიტომ როცა ასეთი შემთხვევა ხდება, ცდილობს მათ ხელი მაქსიმალურად შეუწყოს. მისი თქმით, გეილისთვის ეს სამსახური არა უბრალოდ სამუშაო, არამედ პირველ რიგში, ახალი გამოცდილებაა, რაც საქმის კეთებისას ყველაზე მნიშვნელოვანია.

"ჩემი აზრით, ამ სამსახურთან დაკავშირებით გარკვეული სტიგმები არსებობს, მაგალითად, რომ არ გამოუვათ ან რომ მსგავსი სამუშაო მხოლოდ ახალგაზრდებისთვისაა [...] მაგრამ ჩვენ გვინდა, ხელი შევუწყოთ იმ ადამიანებს, რომელთაც ეს სამსახური მართლაც სურთ, საჭირო უნარების შეძენაში დავეხმაროთ", — აცხადებს ბლუმი.

ბებია როჯერსი სამუშაოთი ძალიან ბედნიერია და ამბობს, რომ ბავშვებისა და მათი მშობლების ყურება, რომლებიც აუზში ერთად თამაშობენ და მზეს ეფიცხებიან, იმაზე სასიამოვნო აღმოჩნდა, ვიდრე ელოდა.