მომღერალმა და სამცხე-ჯავახეთის რეგიონში სახელმწიფო რწმუნებულის მოადგილემ, ზურა ხაჩიძემ, ნუცა ბუზალაძეს მხარი დაუჭირა. ხაჩიძემ ფეისბუქპოსტი გამოაქვეყნა, სადაც წერს, რომ ვერ ხვდება, ბუზალაძე საზოგადოებას ბოდიშს რისთვის უხდის.

კრიტიკა 24 ივნისს ინტერნეტსივრცეში გავრცელებულ ვიდეოს მოჰყვა, რომელშიც რამდენიმე ქართველი მომღერალი, მათ შორის, ნუცა ბუზალაძე, მოსკოვის ერთ-ერთ რესტორანში სიმღერა სამშობლოს ასრულებს. რუსეთში სიმღერას სოციალურ ქსელში გამოეხმაურა თავად ბუზალაძეც, რომელმაც მხარდამჭერებს ბოდიში მოუხადა და თქვა, რომ დაბადების დღეზე მეგობრის თხოვნით იმღერა.

"ვიაზრებ ჩემს პასუხისმგებლობას და გული მტკივა, რომ იმ ადამიანებს, რომლებიც ყოველთვის ყველაზე მეტად გვერდში მიდგანან გული დავწყვიტე და ამისთვის ბოდიში მინდა მოვუხადო ყველას", — წერდა ბუზალაძე.

მომღერლის პოსტს ზურა ხაჩიძე ასე გამოეხმაურა:

"არ მესმის რისთვის იხდი ბოდიშს და საერთოდ რა დააშავე?! მეგობართან სიმღერა როდიდან ტეხავს?! კრემლში იმღერე? საერთოდ ერთი რამე დაიმახსოვრე, ეს ხალხი იმიტომ გიწერს ასეთ საშინელებებს, რომ მათ არაფერი არ გაუკეთებიათ ამ ქვეყნისთვის. შენ წარმატებასთან კი ახლოს არ ჩაუვლიათ. ამ ქვეყნის ის ნაწილი, რომელიც შენ და არამარტო შენ გლანძღავს, მხოლოდ შურით, ბოღმით არის სავსე. ებრძვის ყველაფერს კარგს, ლამაზს და ისეთს, როგორიც შენ ხარ! მიყვარხარ ძალიან და ახლოს არ მიიკარო ეს ნეგატივი, ჩემო ნიჭიერო გოგო", — წერს ხაჩიძე.

გავრცელებულ ვიდეოებში ვხედავთ რუსეთში მოღვაწე მომღერალ სოსო პავლიაშვილს და მეგი გოგიტიძესაც, რომელიც უკრაინის ომის ფონზეც აგრძელებდა რუსეთში სიმღერას. წვეულებას ესწრებოდა პუტინისტური ძალადობრივი ჯგუფის, ალტ-ინფოს დამფუძნებელი, კონსტანტინე მორგოშიაც. დაბადების დღიდან ვიდეოებს სოციალურ ქსელში ეკატერინა სტეფანოვა ავრცელებს.

ამავე თემაზე: