ყოფილი პრემიერმინისტრი ბიძინა ივანიშვილი მიიჩნევს, რომ მას უსამართლოდ ადანაშაულებენ ჟურნალისტების "მიჭირხვნაში". ამის შესახებ მან დღეს, 7 ივნისს, ტექნოპარკში ჟურნალისტებთან შეხვედრისას განაცხადა:

"მე ვერაფრით ვერ ვიზიარებ მოსაზრებას, რომ ჟურნალისტების მიჭირხვნით ვარ დაკავებული. ძალიან ბევრი კარგი შეხვედრა მქონდა, თუ გნებავთ პირველ არხზე, კვესიტაძესთან ძალიან ჩაჭიდებული საუბარი მქონდა, მაგრამ იქ არ იგრძნობოდა, რომ ჩვენ გადავდიოდით რაიმე ნორმებს.

როდესაც ოპოზიციურად განწყობილ ჟურნალისტთან მიდიხარ, ძალიან ხშირად გიწევს მძაფრი კითხვების მოსმენა და მასზე რეაქციის გაკეთებაც. თუ მე ასეთი შეფასებები მაქვს, ძალიან განვიცდი და ძალიან არ მომეწონებოდა, მქონდეს ასეთი შეფასება. სხვათა შორის, ძალიან კარგი გამოცდილება მაქვს და კარგი პრაქტიკა მივიღე დაწყებული რეალ ტვ-დან, რუსთავი 2-ზე და პირველ არხზეც არაორდინალური შეხვედრა მქონდა ბოლო ინტერვიუს დროს. საერთოდ, მე ძალიან მიყვარს ჭეშმარიტების ძიება და ამით ალბათ არ განვსხვავდები სხვა ადამიანებისგან, თქვენც ასეთები ხართ და ვაძლევ თავს უფლებას, თუ ისე არ ვხედავ, ვუპასუხო".

ბიძინა ივანიშვილი დღეს ტელევიზიის ჟურნალისტებს ხვდება. დაანონსებულია მისი შეხვედრა სხვა მედიის წარმომადგენლებთანაც.