21 ივნისს ევროპის 21-წლამდელთა ჩემპიონატი იწყება, რომლის თანამასპინძლებიც საქართველო და რუმინეთი არიან. ტურნირი 8 ივლისს დასრულდება, ფინალი კი ბათუმის აჭარაბეთ არენაზე გაიმართება.

საქართველოს ნაკრები პირველ მატჩს 21 ივნისს 20:00 საათზე პორტუგალიასთან გამართავს. 24 ივნისს ასევე 20:00 საათზე ბელგიას შეხვდება, ხოლო ჯგუფური ეტაპის ბოლო თამაშს იმავე დროს 27 ივნისს ნიდერლანდების ნაკრებთან გამართავს. მატჩები ბორის პაიჭაძის სახელობის დინამო არენაზე ჩატარდება.

ცნობილი გახდა ნაკრების შემადგენლობა და რამაზ სვანაძის განაცხადში ხვიჩა კვარაცხელიასა და გიორგი მიქაუტაძეს ვერ ვხედავთ. ამ საკითხზე ფეხბურთელებმა გულშემატკივრებისთვის განცხადება და განმარტება თავადვე გააკეთეს სოციალური ქსელის მეშვეობით.

"დიდი პატივია, ვიყო იმ გუნდის გაფართოებული შემადგენლობის წევრი, რომელიც რამდენიმე დღეში ევროპის ჩემპიონატზე ითამაშებს. ჩემთვის ყველაზე ხანგრძლივი საფეხბურთო სეზონის შემდეგ, რთულია დროის ასეთ მოკლე მონაკვეთში კვლავ ასეთი მაღალი რანგის შეჯიბრზე თამაში. ამიტომ, მსურს გულშემატკივარმა ჩემგან იცოდეს ჩემი პოზიციის შესახებ. სურვილის მიუხედავად, რთული სეზონის შემდეგ სპორტული მიზეზების გამო, 21-წლამდე ევროპის ჩემპიონატზე მეც თქვენთან ერთად, ჩვენი ნაკრების რიგითი გულშემატკივარი ვიქნები. ახლა სრულად კონცენტრირებული ვარ იმ თამაშებზე, რომელიც საქართველოს ეროვნულ ნაკრებს კვიპროსისა და შოტლანდიის წინააღმდეგ ელოდება", — განაცხადა ხვიჩა კვარაცხელიამ.

გიორგი მიქაუტაძის თქმით კი, ახლა სრულად მოახლოებულ სანაკრებო მატჩებზე ფიქრობს და დატვირთული რეჟიმის გამო ახალგაზრდულ ჩემპიონატზე თამაში რთული იქნება.

აღსანიშნავია, რომ საქართველოს საფეხბურთო ნაკრების მთავარი სპონსორი საქართველოს ბანკია. მოახლოებულ მატჩებთან დაკავშირებით, მათ ახლახან ვიდეორგოლი შექმნეს.

აქვე გთავაზობთ ნაკრების განაცხადს, რომელშიც გიორგი მამარდაშვილსა და ზურიკო დავითაშვილს ვხედავთ. აღსანიშნია ისიც, რომ გიზი მამაგეიშვილი, ლევან თანდილაშვილი და შოთა ნონიკაშვილი გაფართოებულ სიაში იმყოფებიან.

U21-ის შემადგენლობა

მეკარეები: გიორგი მამარდაშვილი (ვალენსია, ესპანეთი), ლუკა კუტალაძე (დინამო თბილისი), ნოდარ ყალიჩავა (სამგურალი).

მცველები: ცოტნე კაპანაძე (საბურთალო), გიორგი გოჩოლეიშვილი (შახტარი დონეცკი, უკრაინა), ივა გელაშვილი (საბურთალო), სანდრო კალანდაძე (დინამო თბილისი), ჯემალ-გიორგი ჯინჯოლავა (საბურთალო), საბა ხვადაგიანი (დინამო თბილისი), ირაკლი აზაროვი (ცრვენა ზვეზდა, სერბეთი), საბა საზონოვი (დინამო მოსკოვი, რუსეთი).

ნახევარმცველები/თავდამსხმელები: ოთარ მამაგეიშვილი (საბურთალო), გიორგი წიტაიშვილი (ლეხ პოზნანი, პოლონეთი), ნიკა ხორხელი (სამგურალი), გაბრიელ სიგუა (დინამო თბილისი), ნიკა გაგნიძე (დილა გორი), გიორგი მოისწრაფიშვილი (დინამო თბილისი), ანზორ მექვაბიშვილი (დინამო თბილისი), ლუკა გაგნიძე (დინამო მოსკოვი, რუსეთი), ზურიკო დავითაშვილი (ბორდო, საფრანგეთი), ნოდარ ლომინაძე (სამგურალი), გიორგი გულიაშვილი (სარაევო, ბოსნია და ჰერცეგოვინა), გიორგი გაგუა (რეალ უნიონი, ესპანეთი).