საქართველოს მთავარი პროკურორი, ირაკლი შოთაძე ამბობს, რომ ე.წ. ციანიდის საქმის მთავარმა მოწმემ, ირაკლი მამალაძემ საქართველო პროკურატურასთან შეთანხმებით დატოვა. ა

"ირაკლი მამალაძე არის სისხლის სამართლის საქმეზე მოწმე. შესაბამისად, ეს არის მისი უფლება დატოვოს საქართველო", - აღნიშნა ირაკლი შოთაძემ, რომლის თქმითაც, მათი ინფორმაციით მამალაძემ "გარკვეული დროის განმავლობაში" დატოვა საქართველო.

ირაკლი მამალაძემ 26 ივნისს გადაცემა პრიორიტეტში საქართველოს დატოვების მიზეზებზე ისაუბრა. მისი თქმით, ის დემორალიზებულია და შეურაცხყოფილად გრძნობს თავს.

მამალაძემ მის მიმართ შესაძლო ზეწოლის გამოსაძიებლად საქართველოს პროკურატურასაც მიმართა.

"გამოძების დაწყებას საფუძვლად დაედო მოქალაქე ირაკლი მამალაძის განცხადება, რომელშიც იგი მიუთითებს, რომ მასზე როგორც ბრალდების მხარის მოწმეზე, მსჯავრდებულ ი. ფირცხალავას მხრიდან ხორციელდება ფსიქოლოგიური ზემოქმედება, რაც მიზნად ისახავს მის მიერ მიცემული ჩვენების შეცვლას," - აცხადებენ პროკურატურაში.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. საქმის მთავარი მოწმე ჟურნალისტი ირაკლი მამალაძეა, რომელიც დეკანოზთან დაახლოებული პირი იყო.

გიორგი მამალაძე წარდგენილ ბრალდებას არ აღიარებს, პროკურატურა კი საპირისპიროს ამტკიცებს. მათ გაავრცელეს ფარული ვიდეოჩანაწერები, რაც, საგამოძიებო უწყების ცნობით, მამალაძის საქმეში ერთ-ერთი მთავარი მტკიცებულებაა.