აბრაკადაბრა!

სეილემში კიდევ ერთხელ დავბრუნდებით — დისნეიმ დაადასტურა, რომ კლასიკად ქცეული საჰელოუინო ფილმი Hocus Pocus მესამე ნაწილით გაგრძელდება. კინოსტუდიის ხელმძღვანელმა შონ ბეილიმ განაცხადა, რომ ამჟამად რამდენიმე მასშტაბურ პროექტზე მიმდინარეობს მუშაობა და ერთ-ერთი მათგანი სწორედ Hocus Pocus 3 არის.

Hocus Pocus 2 წინამორბედის გამოსვლიდან თითქმის 30 წლის შემდეგ, გასული წლის შემოდგომაზე, იხილა მაყურებელმა. ნამუშევარმა გამოსვლისთანავე არაერთი რეკორდი მოხსნა და Disney+-ის სტრიმინგ პლატფორმაზე ყველაზე პოპულარული ფილმი გახდა. ამდენად, გასაკვირი არაა, რომ დისნეიმ მისი გაგრძელება სამომავლო გეგმებში შეიტანა.

ჯერჯერობით, Hocus Pocus 3-ის შესახებ სხვა ინფორმაცია ცნობილი არაა. არც ის ვიცით, ვიხილავთ თუ არა ამ ფილმში ლეგენდარულ ტრიოს — ბეტ მიდლერს, სარა ჯესიკა პარკერსა და კეთი ნაჯიმის — რომლებმაც წინა ორ ნაწილში დები სანდერსონები განასახიერეს. თუმცა, სამივე მსახიობმა პროექტში ჩართვის სურვილი გამოთქვა.

"ყოველთვის მშურდა მათი, ვისაც თავიანთი საყვარელი პერსონაჟის განსახიერების საშუალება არაერთხელ მიეცათ", — განაცხადა მიდლერმა შარშან, — "ვერ წარმომიდგენია, როგორ შეიძლება [მესამე ფილმში] მოვლენები განვითარდეს, მაგრამ უინიფრედი, სარა, მერი და ჩვენი ურთიერთობა ძალიან მიყვარს".

სანდერსონებთან ერთად კი, Hocus Pocus 3-ში, შესაძლოა, პირველი ფილმის გმირებიც ვიხილოთ — მაქსი, დანი და ელისონი. პერსონაჟების დაბრუნების სურვილი გამოთქვეს მსახიობებმაც და ფილმის შემქმნელებმაც.

"პირველ ფილმში მონაწილე მსახიობების Hocus Pocus 2-ში დაბრუნება ვცადეთ, მაგრამ ამა თუ იმ მიზეზის გამო ეს ვერ გამოდიოდა", — ამბობს სცენარისტი ჯენ დ'ანჯელო, — "თუმცა, იმედია, მესამე ფილმში მაქსს და ელისონს კალიფორნიაში ისევ გადავეყრებით".

ფოტო: Disney / Alamy Stock Photo

Hocus Pocus 1993 წელს გამოსული ფენტეზი ფილმია, რომელიც მასაჩუსეტსის პატარა ქალაქ სეილემში მცხოვრები სამი ჯადოქარი დის შესახებ მოგვითხრობს. სანდერსონები 300-წლიანი ძილის შემდეგ ჰელოუინის ღამეს ანთებული სანთლით იღვიძებენ და მარადიული ახალგაზრდობის შესანარჩუნებლად ბავშვებზე ნადირობას იწყებენ. იმის მიუხედავად, რომ ფილმი თავდაპირველად დიდი წარმატებით არ გამოირჩეოდა, წლების შემდეგ ის ჰელოუინის ნამდვილ კლასიკად იქცა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...