რატომ არის მნიშვნელოვანი: 30 მაისს ბრატისლავაში გლობალური უსაფრთხოების სამიტზე მყოფმა საქართველოს პრემიერმინისტრმა რუსეთის უკრაინაში შეჭრის მიზეზად ნატოს გაფართოება დაასახელა, რითაც კრემლის ნარატივი გაიმეორა.

  • მესამე დღეა პარლამენტის წინ აქტივისტები ღარიბაშვილის ამ ანტიდასავლურ განცხადებებს აპროტესტებენ.
  • ჯიუტების ინფორმაციით, ამ პერიოდში შსს-ს თანამშრომლები უხეშად და გაუმართლებლად ერეოდნენ შეკრებისა და მანიფესტაციის თავისუფლებაში.
  • გუშინ გავრცელდა კადრები, რომლებშიც ჩანდა, რომ აქტივისტებთან პოლიცია მივიდა, პლაკატები დაუხია და დაკავება დაიწყო.

რა მოხდა დღეს: აქტივისტები ისევ შეიკრიბნენ — ზოგიერთ მათგანს პლაკატზე "ირაყლი" ეწერა, ზოგი კი საერთოდ ცარიელი ფურცლით იდგა.

  • პოლიციამ აქტივისტები დღესაც დააკავა.
  • ადგილიდან გავრცელებულ კადრში ჩანს, რომ ადვოკატი შოთა თუთბერიძე კიბეზე იჯდა, როცა პოლიცია მივიდა და ძალის გამოყენებით გაიყვანა.
  • ჟურნალისტი მარიამ ნიკურაძე წერს, რომ მას პოსტერზე "ირაყლი" ეწერა.

შემდეგ, სოლიდარობის ნიშნად პარლამენტთან უფლებადამცველები მივიდნენ და "ირაყლის" პოსტერები დაიჭირეს.

  • საფარის ხელმძღვანელი ბაია პატარაია წერდა, რომ პოლიცია იქვე იდგა, მაგრამ მათ არ აკავებდა.
  • მოგვიანებით, იურისტმა გიორგი მშვენიერაძემ პირდაპირ ეთერში განაცხადა, რომ GDI-ის ხელმძღვანელი, ედუარდ მარიკაშვილი დააკავეს.
  • უფლებადამცველები ამბობენ, რომ ამ დროს ის ცარიელი ფურცლით იდგა.
  • დაკავებული არიან საბა რაჭველი და ნიკა რომანაძეც.

კონტექსტი: პოსტერების და აზრის გამოხატვის გამო დაპატიმრება რუსეთში ფართოდ გავრცელებული მეთოდია.

  • ომის დაწყების შემდეგ რუსეთის მოქალაქეებს ერთსიტყვიანი და ცარიელი ფურცლების გამოც იჭერდნენ და ჯარის დისკრედიტაციისთვის ასამართლებდნენ.
  • დროთა განმავლობაში ეს პრაქტიკა საქართველოშიც დამკვიდრდა, როცა აქტივისტების დაკავება მონის და მონა ლიზას დაძახების გამო დაიწყეს.