რატომ არის მნიშვნელოვანი: კულტურის სამინისტრომ ჩხეიძე კინოცენტრის დირექტორის თანამდებობიდან გასული წლის 18 მარტს გაათავისუფლა.

• მიზეზად აუდიტის დასკვნა დაასახელა, რომლის მიხედვითაც, ფინანსური რესურსების "კანონმდებლობასთან შეუსაბამო ხარჯვის ფაქტები" გამოვლინდა.
• პირველ ივნისს ინსტიტუტმა ჩხეიძე გოეთეს მედლით დააჯილდოვა და მიუთითა, რომ ის უკრაინის მხარდაჭერის გამო გაათავისუფლეს.
• პასუხად დღეს კინოცენტრმა ვრცელი განცხადება გაავრცელა, სადაც გოეთეს ინსტიტუტის საიტზე აღნიშნულ ინფორმაციას ტყუილი უწოდა.

დეტალები: როგორც კინოცენტრი წერს, სტატია შეიცავს "მცდარ და ფარისევლურ ბრალდებას" იმაზე, რომ ჩხაიძე თანამდებობიდან უკრაინის მხარდამჭერი პოზიციის გამო გაათავისუფლეს.

• "ამგვარი უტიფარი სიყალბე უსაფუძვლოდ აყენებს ჩრდილს კინოცენტრის, როგორც სახელმწიფო ინსტიტუტის რეპუტაციას და მან, შეიძლება, შეცნობაში შეიყვანოს და დააბნიოს საზოგადოება".
• იმეორებენ წულუკიანის უწყების ნათქვამს, რომ ჩხაიძე თანამდებობიდან კულტურის სამინისტროს შიდა აუდიტის ანგარიშის საფუძველზე გათავისუფლდა.
• "გამოვლინდა კინოცენტრის დირექტორის, გიგა ჩხეიძის მიერ ფინანსური რესურსის კანონმდებლობასთან შეუსაბამო ხარჯვის ფაქტები, კინოცენტრში არსებული ფინანსური მართვის სისტემის სერიოზული ხარვეზები, შესყიდვების შესახებ საქართველოს კანონმდებლობის დარღვევის სისტემური ხასიათი, ნეპოტიზმი, კონტროლის სისტემის არარსებობა და მრავალი სხვა".
• აღნიშნავენ, რომ დასკვნა გადაუგზავნეს პროკურატურას, რომელმაც გამოძიება კინოცენტრის კუთვნილი თანხის მართლსაწინააღმდეგო გაფლანგვის მუხლით დაიწყო.
• "გამომდინარე აქედან, გაგა ჩხეიძის სამსახურიდან გათავისუფლების მიზეზად დასახელებული ბრალდებები, თითქოსდა რუსეთ-უკრაინის ომთან მის მიერ საჯაროდ გამოხატულ პოზიციასთან დაკავშირებით, უსაფუძვლოა, სიცრუეა და არანაირი კავშირი არ აქვს არც ელემენტარულ სიმართლესთან და არც მორალთან".

კინოცენტრში ამბობენ, რომ თბილისის საერთაშორისო კინოფესტივალი, რომლის დირექტორიც ჩხეიძეა, 2022 წელს 150 000 ლარით დააფინანსეს, ხოლო 2023-ში — 125 000-ით.

• წერენ, რომ იგივე ფესტივალი კულტურის სამინისტროს მიერ 2021 წელს 47 000 ლარით დაფინანსდა.
• "უმარტივესი კითხვა იბადება — თუკი კინოცენტრი უკრაინას არ უჭერს მხარს (გოეთეს ინსტიტუტის სტატიის ავტორთა ლოგიკით) და ამ მიზეზით "ჩაგრული" გაგა ჩხეიძეზე თავისუფლდება თანამდებობიდან, ამავე გაგა ჩხეიძეს ფესტივალს რატომ უფინანსებს?" — წერს კინოცენტრი.
• ბოლოს კი ამბობენ, რომ "იტოვებენ უფლებას, გადასინჯონ თავისი გადაწყვეტილება გაგა ჩხაიძეს დირექტორობით ჩატარებული კინოფესტივალის დაფინანსების გაგრძელების თაობაზე".