უკრაინის თავდაცვის სამინისტროს ცნობით, უკრაინის ჯარები უკვე ბახმუტის სამხრეთ-დასავლეთ ნაწილს აკონტროლებენ და ფრონტზე წინ მიიწევენ.

რატომ არის მნიშვნელოვანი: აღმოსავლეთ უკრაინაში მდებარე ბახმუტი საეჭვო სტრატეგიული ღირებულების, მაგრამ სიმბოლური მნიშვნელობის ქალაქია, რომლის ასაღებადაც თვეებია სასტიკი ბრძოლები მიმდინარეობს.

  • რუსეთმა არაერთხელ გაავრცელა ინფორმაცია, რომ ალყა შემოარტყა ქალაქს, თუმცა, აქამდე, ჯერ არ დადასტურებულა უკრაინელების დანებება და ქალაქის დატოვება.
  • თვეების ჩიხის შემდეგ, ღიად განიხილება უკრაინის კონტრშეტევა — ახლად შემოსული დასავლური იარაღის დახმარებით, მაგრამ უკრაინის პრეზიდენტმა ხუთშაბათს განაცხადა, რომ ჯერ ნაადრევია თავდასხმის დაწყება.

დეტალები: უკრაინის თავდაცვის მინისტრის მოადგილის, ანა მალიარის ინფორმაციით, ოკუპანტები ბახმუტისკენ ძალების მობილიზებას ახდენენ.

  • "დღის განმავლობაში ბახმუტის გარეუბანში სამხრეთით სასტიკი ბრძოლები მიმდინარეობდა. მტერი შეტევაზე გადმოვიდა და სცადა დაკარგული ტერიტორიების დაბრუნება, მაგრამ განიცადა დანაკარგები და ვერ შეასრულა თავისი ამოცანები. ზოგიერთ რაიონში ჩვენმა ჯარებმა 1 კმ-ით წაიწიეს წინ", — წერს მალიარი ტელეგრამის არხზე
  • მისი განცხადებით, უკრაინამ დღეს რუსეთის ორგანიზებული ყველა შეტევის მომარაგება შეძლო.
  • ნატოს გენერალურმა მდივანმა დღეს განაცხადა, რომ უკრაინულ ჯარებს უკვე აქვთ ყველა საჭირო საშუალება ოკუპირებული მიწების დასაბრუნებლად.