საქართველოს მართლმადიდებელი ეკლესიის საპატრიარქომ დღეს გაავრცელა შორენა თეთრუაშვილის მკვლელობის მცდელობაში ბრალდებული დეკანოზ გიორგი მამალაძის ოჯახთან შეხვედრის აუდიო ჩანაწერში. დაახლოებით 35-წუთიან ჩანაწერში რამდენჯერმე ისმის გიორგი მამალაძის ძმის, თორნიკე მამალაძის ძმის თხოვნა პატრიარქისადმი.

კერძოდ, თორნიკე მამალაძე პატრიარქს სთხოვს, თავდებში პირადად ჩაუდგეს გიორგი მამალაძეს და სასამართლო განაჩენამდე ციხიდან გამოვიდეს, ეს პერიოდი კი ან პატრიარქის მეთვალყურეობის ქვეშ გაატაროს, ან მონასტერში წავიდეს. თორნიკე მამალაძის თქმით, დეკანოზის ციხეში ყოფნა ერთნაირად დამთრგუნველია როგორც თავად მისთვის, ისე - ოჯახისთვის.

თორნიკე მამალაძემ აღნიშნული თხოვნა ილია მეორეს არაერთხელ გაუმეორა, თუმცა პატრიარქმა მას ამ თხოვნაზე არ უპასუხა, ერთ მომენტში კი მან დაცვას დეკანოზის ატირებული ბავშვის თავისთან მიყვანა სთხოვა. თორნიკე მამალაძემ მას კითხვა, დაუდგებით თუ არა თავდებშიო გიორგი მამალაძეს, კიდევ გაუმერა, რაზეც შეხვედრაზე მყოფმა სხვა სასულიერო პირებმა უპასუხეს, მათ შორის იყო მეუფე თეოდორე:

"თავდებობა სხვა საკითხია, ეს ჩვენი გადასაწყვეტი არ არის, ზუსტად ვერ გეტყვით, ასე ადვილი არ არის".

დეკანოზის ოჯახმა პატრიარქს ასევე სთხოვა, შეხვედროდა მამალაძის ადვოკატებს და მათგან მოესმინა საქმის დეტალები, რაზეც პატრიარქმა ასე უპასუხა:

"არა, მე ახლა განხილვას ხომ არ დავიწყებ, იურისტი არ ვარ და არაფერი".

შეხვედრაზე მყოფმა მამალაძის ოჯახის წევრებმა სასულიერო პირებს ჰკითხეს, გამოეთქვათ პირადი აზრი, სჯერათ თუ არა მათ მისი დანაშაულის. სასულიერო პირების თქმით, ამაზე საჯაროდ საუბარი არ სურთ. ილია მეორემ კი მამალაძეზე ასეთი რამ თქვა:

მე ცუდი არაფერი მინახავს მამა გიორგისგან და ეს იყო ჩემთვის ცის ჩამოვარდნა, როცა მითხრეს, რომ დააპატიმრეს მამა გიორგიო. მაგრამ ღმერთი მოწყალეა და მშვიდობა მისცეს მამა გიორგის ოჯახს

ილია მეორემ ასევე უარი თქვა შეხვდეს გიორგი მამალაძე, რათა ეს შესაძლოა მისი მხრიდან გავლენის მოხდენის მცდელობად იქნეს აღქმული. 35-წუთიანი შეხვედრისას ილია მეორემ დალოცა დეკანოზის ოჯახი, ასევე უსაყვედურა მათ საჯარო განცხადებების გამო. მამალაძის ოჯახმა საყვედური ასევე დაიმსახურა მეუფე იაკობისა და პატრიარქის მდივან-რეფერენტის, შორენა თეთრუაშვილის კრიტიკისთვის. მამალაძის ოჯახს უთხრეს, რომ პატრიარქი ყველაფრის საქმის კურსშია და ყველაფერი იცის, რაც შეეხება მეუფე იაკობს, ის პატრიარქის ნდობით აღჭურვილი პირია.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად.

გიორგი მამალაძე წარდგენილ ბრალდებას არ აღიარებს, პროკურატურა კი საპირისპიროს ამტკიცებს. მათ გაავრცელეს ფარული ვიდეოჩანაწერები, რაც, საგამოძიებო უწყების ცნობით, მამალაძის საქმეში ერთ-ერთი მთავარი მტკიცებულებაა.