პორტუგალიელი ცუგა, რომელმაც თებერვალში გინესის რეკორდი დაამყარა, ახლახან 31 წლის გახდა. ბობიმ მსოფლიოს ყველაზე ხანდაზმული ძაღლის ტიტული 30 წლის ასაკში მიიღო. ახლა კი ბობის მზრუნველმა ოჯახმა დაბადების დღის აღსანიშნად დიდი წვეულება მოუწყო.

ბობის პატრონის თქმით, წვეულებას 100-ზე მეტი ადამიანი დაესწრო და ცუგასთვის მოცეკვავეებიც კი მოიყვანეს. 31 წლის ბობი მთელი საღამო ყურადღების ცენტრში იყო, თუმცა მას ეს არც აქამდე აკლდა.

ფოტო: Getty Images

"ბობის სანახავად და მასთან ფოტოების გადასაღებად ჟურნალისტებთან ერთად უამრავი ადამიანი მოდის", — განაცხადა ბობის პატრონმა და ასევე დასძინა, რომ სტუმრების გამო ბობი ბოლო პერიოდში სტრესშია. ბობის გამოკვლევებიც ჩაუტარდა და მის ჯანმრთელობას საფრთხე არ ემუქრება, თუმცა ასაკის მატებასთან ერთად სიარული უჭირს და მხედველობის პრობლემებიც აქვს.

ბობის პატრონის თქმით, თავად 8 წლის იყო, როცა ცუგა დაიბადა და მასთან ერთად გაიზარდა. ბობის ასაკის საიდუმლოდ კი, ის მშვიდ და მზრუნველ გარემოს მიიჩნევს.