შინაგან საქმეთა სამინისტროს განცხადებით, შსს-ს თბილისის პოლიციის დეპარტამენტის ისანი-სამგორის სამმართველოს მე-7 განყოფილების უფროსი გათავისუფლებულია დაკავებული თანამდებობიდან.

საქმეზე გამოძიებას, საქართველოს სსკ-ს 333-ე მუხლის მე-3 ნაწილით პროკურატურა აწარმოებს. აღნიშნული მუხლი გულისხმობს სამსახურეობრივი უფლებამოსილების გადამეტებას არაერთგზის, ძალადობით ან იარაღის გამოყენებით, ან დაზარალებულის პირადი ღირსების შეურაცხყოფით.

დანაშაული ისჯება თავისუფლების აღკვეთით ვადით ხუთიდან რვა წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

საქმე ეხება ნარკოდანაშაულის ბრალდებით დაკავებულ, შოთა პაკელიანის ჩხრეკის პროცედურებს პოლიციის განყოფილებაში.

ისანი-სამგორის სამმართველოს პოლიციის მე-7 განყოფილების შიდა კამერების მიერ გადაღებული ვიდეოკადრები ლიბერალს წყარომ მიაწოდა. მათივე ცნობით, კადრებში ჩანს შოთა პაკელიანის ჩხრეკა და შემდეგ - მისი გაშიშვლება.

შოთა პაკელიანი 2017 წლის 23 მარტს ნარკოდანაშაულის ბრალდებით დააკავეს. მას ბრალი წარედგინა საქართველოს სსკ-ს 260-ე მუხლის მე-3 ნაწილის „დ“ და „ე“ ქვეპუნქტებით. თბილისის საქალაქო სასამართლომ შოთა პაკელიანს აღკვეთის ღონისძიების სახით პატიმრობა შეუფარდა.