ამ თემაზე უკრაინის მმართველი პარტიის თავმჯდომარემ მთავარ არხთან ინტერვიუში ისაუბრა.

რატომ არის მნიშვნელოვანი: უკრაინამ საქართველოდან ელჩი, იგორ დოლგოვი გასული წლის მარტში გაიწვია.

  • "მოხალისეების არგამოშვებისა და სანქციებთან დაკავშირებით ამორალური პოზიციის გამო", — ასე ახსნა ვოლოდიმირ ზელენსკიმ გადაწყვეტილება.

დეტალები: დავით არახამია ამბობს, რომ ელჩის დასანიშნად საქართველომ პირველი ნაბიჯი უნდა გადადგას, რაც, მისივე თქმით, ნიკა გვარამიას გათავისუფლება იქნება.

  • "თუკი მას ციხიდან გამოუშვებენ, მე ვიქნები პირველი, ვინც წავა ჩემს პრეზიდენტთან და ვთხოვ, რომ გავუშვათ ელჩი თბილისში", — თქვა მან.

  • მანამდე არახამიამ გვარამიას პატიმრობას წარმოუდგენელი უწოდა და განაცხადა, რომ ევროპელი პარტნიორები ამ საქმით გაოგნებულები არიან.

  • "თუკი წახვალთ ბრიუსელში, სტრასბურგში და ახსენებთ ნიკა გვარამიას საქმეს, ევროპელ მაღალჩინოსნებს აღარ უჩნდებათ სურვილი, საქართველოს მთავრობის წევრებს ხელი ჩამოართვან".