ინფორმაციას სახელმწიფო უსაფრთხოების სამსახური ავრცელებს, თუმცა არ ასახელებს დაკავებული პირის ვინაობას.

რატომ არის მნიშვნელოვანი: უწყების ცნობით, ეროვნულ კონტრტერორისტულ სისტემაში ჩართული უწყებების მიერ წარმოებული ოპერაციების შედეგად, გამოვლენილია ტერორისტული ორგანიზაცია ისლამური სახელმწიფოს აქტივობები სხვადასხვა უცხო ქვეყნის ტერიტორიაზე.

  • "ცალსახად გამოვრიცხავთ უცხოურ მედია საშუალებებში გავრცელებულ ინფორმაციას, საქართველოს ტერიტორიაზე ტერორისტული მიზნებით სამხედრო მომზადებისა და საწვრთნელი ბაზების არსებობის თაობაზე", — განაცხადა ბაჩა მგელაძემ, სუსის კონტრტერორისტული ცენტრის დირექტორის მოვალეობის შემსრულებელმა.

დეტალები: საგამოძიებო ქმედებების შედეგად კი მოპოვებულია მასალები და მტკიცებულებები, რითაც დასტურდება უცხო ქვეყნებში მიმდინარე ტერორისტული აქტივობები.

  • უსაფრთხოების სამსახურმა მოიპოვა ელექტრონული ინფორმაციის მატარებელი მოწყობილობა, საიდანაც ამოღებულია ამერიკის შეერთებული შტატებისა და ევროპის დედაქალაქების სტრატეგიული ობიექტების სატელიტური ფოტოები.
  • იდენტიფიცირებულია ტერორისტულ ორგანიზაციასთან შემხებლობაში მყოფი პირები, კომუნიკაციის ფორმები, მეთოდები, დაინტერესების სფეროები და შესაძლო თავდასხმის ობიექტები საქართველოს ფარგლებს გარეთ.