ამის შესახებ საგამოძიებო დეპარტამენტის სამმართველოს უფროსმა, ბაჩო კვარაცხელიამ ბრიფინგზე ისაუბრა.

რატომ არის მნიშვნელოვანი: 4 მაისს, თბილისში, გოგებაშვილის ქუჩაზე, სროლას ერთი პირი ემსხვერპლა, 2 კი დაიჭრა, მათ შორის, ადგილზე გამვლელი ტურისტი.

  • საქმეზე გამოძიება დაიწყო სსკ-ის 108-ე მუხლით, რაც განზრახ მკვლელობას გულისხმობს.

დეტალები: სპეციალური საგამოძიებო სამსახურის ცნობით, განზრახ მკვლელობისა და ცეცხლსასროლი იარაღის მართლსაწინააღმდეგო ტარების ბრალდებით დაცვის პოლიციის დეპარტამენტის პირადი დაცვის სამმართველოს უფროსი ინსპექტორი დააკავეს.

  • უწყების განცხადებით, დაკავებული გოგებაშვილზე მდებარე რესტორანთან იმყოფებოდა დასაცავი პირის ნათესავთან ერთად, რა დროსაც ამ უკანასკნელს ცეცხლი გაუხსნეს.
  • "ადგილზე მყოფმა დაცვის სამმართველოს უფროსმა ინსპექტორმა [თავდამსხმელს] შემთხვევის ადგილის დატოვების შესაძლებლობა არ მისცა და სხეულის მიდამოში რამდენჯერმე ესროლა მის ხელთ არსებული ცეცხლსასროლი იარაღით, რომელსაც კანონის მოთხოვნათა დარღვევით ატარებდა", — თქვა კვარაცხელიამ.
  • თავდამსხმელი გულ-მკერდის არეში მიყენებული ცეცხლსასროლი დაზიანებით ადგილზე გარდაიცვალა.