რატომ არის მნიშვნელოვანი: ძაღლს, რომელმაც მარტვილში ადამიანები დაკბინა, ცოფი დაუდასტურდა.

  • სურსათის ეროვნული სააგენტოს ცნობით, ძაღლი მეთვალყურეობის მიზნით ოზურგეთის ცხოველთა თავშესაფარში გადაიყვანეს, სადაც მოკვდა.
  • ლაბორატორიული კვლევების შედეგად კი დადასტურდა, რომ ის ცოფით იყო ინფიცირებული.
  • გამოცემა თაიმერი წერდა, რომ ძაღლმა 22 ადამიანი დაკბინა და მათ ცოფის საწინააღმდეგო პირველი აცრა უკვე გაუკეთდათ, ხოლო ორი უარს აცხადებდა მკურნალობაზე.
  • თუმცა მარტვილის მერია მხოლოდ 10 ადამიანის დაკბენაზე საუბრობს.

დეტალები: სეს-ში დღეს განმარტეს, რომ ვეტერინარები პროტოკოლით გათვალისწინებულ ღონისძიებებს ახორციელებენ, რაც ამთვისებელი ცხოველების იძულებით ვაქცინაციას, სადეზინფექციო სამუშაოების ჩატარებასა და საკარანტინო შეზღუდვებს გულისხმობს.

  • მოგვიანებით კი მერიამ განაცხადა, რომ ვეტერინარული კარანტინი შემოიღეს.

კარანტინი მოქმედებს ქალაქ მარტვილში, დაავადების კერიდან 10 კილომეტრის რადიუსში.

  • განკარგულების თანახმად, ცოფისთვის საშიშ ბუფერულ ზონაში, გატარდება ცხოველების ვაქცინაცია, 2-3 კილომეტრის რადიუსით (განურჩევლად წინა ვაქცინაციის ჩატარების ვადებისა), აცრილი ცხოველის იზოლირება უნდა მოხდეს აცრიდან 60 დღის განმავლობაში.
  • კარანტინის პერიოდში, იკრძალება ძაღლების ქუჩაში გაყვანაც.
  • მოხდება ცოფიანი და დაავადებაზე საეჭვო ცხოველების სადგომებისა და დადორბლილი საგნების დეზინფექცია.
  • განკარგულების შესაბამისად ადამიანები, რომლებიც დაკბენილები ან დადორბლილები იყვნენ ცხოველის მიერ აყვანილი არიან ანტირაბიულ კონტროლზე.
  • არსებული კარანტინი მოიხსნება ცოფით ცხოველის დაავადების უკანასკნელი შემთხვევის დაფიქსირების და სალიკვიდაციო ღონისძიებების ჩატარებიდან 60 დღის შემდეგ.