რატომ არის მნიშვნელოვანი: ომის დაწყების შემდეგ რუსები უკრაინის ოკუპირებული რეგიონებიდან ბავშვებს იტაცებენ და იძულებით აშვილებენ, ამაში დიდ როლს თამაშობს ე.წ. ბავშვთა უფლებადამცველი მარია ლვოვა-ბელოვა.

  • კრემლი არასრულწლოვნებს პროპაგანდისტული სიუჟეტების მოსამზადებლად იყენებს და ამტკიცებინებს, თითქოს უკრაინის შეიარაღებული ძალები მტერია, რუსეთი კი მეგობარი.
  • უკვე ხუთი სამაშველო მისია ჩატარდა, რომლის დროსაც უკრაინაში ათობით ბავშვი დააბრუნეს.

დეტალები: რეზოლუცია სტრასბურგში გუშინ, 27 აპრილს მიიღეს. დოკუმენტში ნათქვამია, რომ უნდა შეიქმნას პირობები უკრაინაში მათი უსაფრთხოდ დაბრუნებისთვის, უნდა შეწყდეს დანაშაულები და დაისაჯონ დამნაშავეები.

  • ასამბლეამ ხაზი გაუსვა, რომ 1948 წელს მიღებული გენოციდის შესახებ კონვენციის მე-2 მუხლის ე ქვეპუნქტის თანახმად, ბავშვების იძულებით გადაყვანა ერთი ჯგუფიდან მეორეში, იმ მიზნით, რომ ნაწილობრივ ან მთლიანად გაანადგუროს ეროვნული, ეთნიკური, რასობრივი ან რელიგიური ჯგუფი, გენოციდის დანაშაულად არის მიჩნეული.
  • მათივე თქმით, უკრაინელი ბავშვების რუსეთში ან მის მიერ დროებით ოკუპირებულ ტერიტორიებზე იძულებით დეპორტაციასთან დაკავშირებით მტკიცებულებები შეესაბამება ამ კრიტერიუმებს.

გარდა ამისა, დოკუმენტში ვკითხულობთ, რომ დონეცკისა და ლუგანსკის ოლქების დროებით ოკუპირებული ტერიტორიებიდან უკრაინელების უკანონო დეპორტაცია რუსეთში ომის დაწყებამდეც ხდებოდა.

  • ევროპის საბჭოს საპარლამენტო ასამბლეამ მოუწოდა სისხლის სამართლის საერთაშორისო სასამართლოს, განიხილოს ამ დანაშაულისთვის პასუხისგებაში მიცემის შესაძლებლობა.
  • ასევე, ასამბლეამ მხარი დაუჭირა გენოციდის დანაშაულის მტკიცებულებების საფუძვლიან შეგროვებასა და შეფასებას, როგორც ეს გათვალისწინებულია რომის სტატუტითა და გენოციდის კონვენციით.

ზელენსკის თქმით, მიღებული გადაწყვეტილება მნიშვნელოვანი პოლიტიკური შედეგია და ის უკრაინას დაეხმარება, რათა რუსეთი და მისი ოფიციალური პირები, მათ შორის, ტერორისტული სახელმწიფოს მეთაური პასუხისგებაში მიეცენ.

  • მისივე განცხადებით, ბავშვების დეპორტაცია, ეს არის რუსეთის მცდელობა, წაშალოს უკრაინელი ხალხის იდენტობა.
  • "ჩვენ ვაგრძელებთ მუშაობას ყველა დეპორტირებული უკრაინელი ბავშვის დასაბრუნებლად და რუსეთის დასასჯელად".