ამის შესახებ ირაკლი ღარიბაშვილმა მთავრობის სხდომაზე ისაუბრა.

რატომ არის მნიშვნელოვანი: საუბარია წელიწადში 300 ბავშვზე, რომლებსაც, პრემიერის თქმით, საზღვარგარეთ მკურნალობის, ცხოვრებისა თუ მგზავრობის ხარჯები დაუფინანსდებათ.

  • მისივე განცხადებით, ამისთვის ბიუჯეტიდან 30 მილიონი ლარი გამოიყოფა.

დეტალები: პრემიერმინისტრი ამბობს, რომ უკვე გამოკვეთილი აქვთ რამდენიმე საუკეთესო კლინიკა, სადაც ონკოლოგიური პაციენტი ბავშვები იმკურნალებენ.

  • "საქართველოში, სამწუხაროდ, დღეს არ არის ყველა ის პირობა შექმნილი, რომ სრულყოფილი და რაც მთავარია ხარისხიანი და მაღალი სტანდარტის სერვისები მივაწოდოთ. ხშირ შემთხვევაში ჩვენ გვჭირდება ამ ბავშვების მკურნალობა საზღვარგარეთ. რა თქმა უნდა, ამის საშუალება ჩვენს მოქალაქეებს არ აქვთ", — თქვა მან.

სტრიქონებს შორის: ღარიბაშვილმა ეს განცხადება მთავრობის სხდომიდან მაშინ გაავრცელა, როდესაც კანცელარიასთან აქონდროპლაზიის მქონე დიაგნოზის ბავშვების მშობლების უწყვეტი პროტესტი მიმდინარეობდა.

  • ისინი ერთ წელზე მეტია შვილებისთვის სასიცოცხლოდ მნიშვნელოვანი მედიკამენტის დაფინანსებას ითხოვენ, ბოლო რამდენიმე დღეა კი ღამეს კანცელარიასთან ათენებენ.
  • საუბარია საქართველოში მცხოვრებ 16 ბავშვებზე, რომლებსაც ეს დიაგნოზი აქვთ.