რატომ არის მნიშვნელოვანი: სუდანში ჯარსა და გასამხედროებულ ძალებს (RSF) შორის შეტაკებებია — დაძაბულობა მას შემდეგ გამწვავდა, რაც მთავრობამ და RSF-მ სამოქალაქო მმართველობაზე გადასვლის შეთანხმებას ვერ მიაღწიეს.

  • დაღუპულია ასეულობით ადამიანი, მათ შორის, მშვიდობიანი მოქალაქეები.
  • სუდანში ამ დრომდე საქართველოს 35-მდე მოქალაქე რჩება, თუმცა კონკრეტულ ციფრს საგარეო სამინისტროში არ აკონკრეტებენ.
  • დაპირისპირებულ ზონაში არიან ქართული ავიაკომპანიების, ჯეო სქაისა და მაი ვეის თანამშრომლები.
  • საგარეო საქმეთა მინისტრის მოადგილემ, ალექსანდრე ხვთისიაშვილმა განაცხადა, რომ ქალაქში გადაადგილება გართულებულია, ამიტომ სურსათისა და წყლის ნაკლებობაა.
  • მანვე თქვა, რომ კოორდინაციაში არიან საქართველოს მოქალაქეებთან, ძირითადად, კი მათთან, ვინც დედაქალაქ ხარტუმში იმყოფება.

დეტალები: დღეს საგარეო საქმეთა სამინისტროში On.ge-ის განუცხადეს, რომ ჩვენი მოქალაქეები ქ. ხარტუმის აეროპორტის მიმდებარე ტერიტორიიდან მეტად უსაფრთხო ადგილას გადაიყვანეს, საიდანაც შემდგომი ევაკუაცია განხორციელდება.

  • "საქართველოს საგარეო საქმეთა სამინისტროს და დამსაქმებელი კომპანიის ერთობლივი მუშაობით მოხერხდა ცხელი წერტილიდან, სადაც მუდმივი შეტაკებები მიმდინარეობს, საქართველოს მოქალაქეების უსაფრთხო ადგილას გადაყვანა. ამჟამად მოქალაქეები იმყოფებიან ქალაქის უსაფრთხო ნაწილში", — აცხადებს საგარეო საქმეთა სამინისტრო.