Foreign Policy სტატიას აქვეყნებს სათაურით "კონგრესი საქართველოს პოლიტპატიმრების გათავისუფლებისკენ მოუწოდებს".

რატომ არის მნიშვნელოვანი: გამოცემა ხაზგასმით წერს, რომ აშშ-ის მთავრობის ადამიანის უფლებათა დაცვის ორგანიზაცია მოუწოდებს საქართველოს, შეწყვიტოს პროევროპელი ფიგურების პოლიტიკურად მოტივირებული დევნა, "სულ რაღაც ერთი თვის შემდეგ, რაც მთავრობამ დაარბია უცხოელი აგენტების კანონის საწინააღმდეგო დემონსტრანტები".

  • გარდა ამისა, აღნიშნულია, რომ ორპარტიული ჰელსინკის კომისია მოუწოდებს საქართველოს პრეზიდენტს, გამოიყენოს შეწყალების უფლება ევროპული ინტეგრაციის მომხრე პოლიტიკური პატიმრების გასათავისუფლებლად

დეტალები: გამოცემის ინფორმაციით, ხუთშაბათს გაგზავნილ წერილში ჰელსინკის კომისიის ლიდერები, პარლამენტის წევრი ჯო უილსონი და სენატორი ბენ კარდინი, სტივ კოენთან და როჯერ ვიკერთან ერთად მოუწოდებენ ზურაბიშვილს, გაათავისუფლოს ნიკა გვარამია.

  • "როგორც საქართველოს ევროატლანტიკური ინტეგრაციისა და მისი დემოკრატიის დაცვის ხმამაღალი მხარდამჭერი, ჩვენ გვჯერა, რომ თქვენი დახმარება ერთი შეხედვით პოლიტიკურად მოტივირებული დევნის აღმოფხვრაში კრიტიკულად მნიშვნელოვანი ნაბიჯი იქნება ამ გზაზე", — წერენ ამერიკელი კანონმდებლები ზურაბიშვილს.
  • ისინი ხაზს უსვამენ, რომ პრეზიდენტობის განმავლობაში ზურაბიშვილი იყო გამოკვეთილი და პრინციპული ლიდერი ქართული დემოკრატიისა და ევროატლანტიკური ინტეგრაციის საკითხებში.
  • "ამ მიზნით, ჩვენ გვჯერა, რომ საქართველოში პოლიტიკური დევნის ციკლის გაწყვეტა, როგორიცაა ბატონი გვარამიას გათავისუფლების უზრუნველყოფა, არა მხოლოდ მნიშვნელოვანი ჰუმანიტარული ჟესტი და უსამართლობის გამოსწორებაა, არამედ კრიტიკული ნაბიჯია იმის უზრუნველსაყოფად, რომ ქვეყანამ დაიმსახუროს ევროკავშირის კანდიდატურა", — ვკითხულობთ წერილში.

კონტექსტი: პოლიტპატიმრების შესახებ უკვე არაერთმა პარტნიორმა ისაუბრა და მიმართეს, როგორც მთავრობას, ასევე, პრეზიდენტს.

  • 14 მარტს ევროპარლამენტში საქართველოს შესახებ დებატები გაიმართა, სადაც ისაუბრეს მთავარი არხის დამფუძნებლის, ნიკა გვარამიასა და ყოფილი პრეზიდენტის, მიხეილ სააკაშვილი პატიმრობაზეც.
  • 20 აპრილს ადამიანის უფლებათა დამცველმა და პრესის თავისუფლებისთვის მომუშავე საერთაშორისო ორგანიზაციებმა ზურაბიშვილს ღია წერილი გაუგზავნეს და განაცხადეს, რომ გვარამიას ციხიდან გათავისუფლების უზრუნველყოფა მნიშვნელოვანი ნაბიჯი იქნება საქართველოს ევროპული მისწრაფებების რეალიზაციისკენ.