ადამიანის უფლებათა დამცველი და პრესის თავისუფლებისთვის მომუშავე საერთაშორისო ორგანიზაციები სალომე ზურაბიშვილს ღია წერილს უგზავნიან.

რატომ არის მნიშვნელოვანი: ხელმომწერი ორგანიზაციების შეფასებით, საქართველოში პრესის თავისუფლებისთვის სასიცოცხლოდ მნიშვნელოვანია ჟურნალისტ ნიკა გვარამიას ციხიდან განთავისუფლება.

  • "გვარამიას პატიმრობა, რომელიც საქართველოს პოსტსაბჭოთა ევრაზიის რეპრესიული, ავტორიტარული სახელმწიფოების სიაში აყენებს, ზიანს აყენებს თქვენი ქვეყნის რეპუტაციას", — ნათქვამია წერილში.
  • ორგანიზაციების შეფასებით, გვარამიას ციხიდან გათავისუფლების უზრუნველყოფა მნიშვნელოვანი ნაბიჯი იქნება საქართველოს ევროპული მისწრაფებების რეალიზაციისკენ.
  • ისინი საქართველოს პრეზიდენტს მოუწოდებენ, გააგრძელოს ქართველი ხალხის მიერ უცხოელი აგენტების კანონის მკვეთრი უარყოფის იმპულსი და დაიკავოს მორიგი მნიშვნელოვანი პოზიცია საქართველოში პრესის თავისუფლების და ქვეყნის დემოკრატიული მომავლის გასაძლიერებლად.
  • "მოგიწოდებთ, გამოიყენოთ თქვენი აღმასრულებელი უფლებამოსილება ნიკა გვარამიას ციხიდან დაუყოვნებლივ და უპირობოდ გასათავისუფლებლად", — ასე სრულდება საერთაშორისო ორგანიზაციების პრეზიდენტისადმი მიმართვა.

ამასთანავე, წერილში მოყვანილია შემდეგი ფაქტები:

  • შეერთებული შტატების საელჩომ განაცხადა, რომ გვარამიას ნასამართლობა "კითხვის ქვეშ აყენებს საქართველოს ერთგულებას კანონის უზენაესობისადმი".
  • ევროპარლამენტმა რეზოლუციით დაგმო მისი პატიმრობა და ბრალდებებს "საეჭვო" უწოდა.
  • საქართველოს სახალხო დამცველმა დაასკვნა, რომ გვარამიას საქმეს სისხლის სამართლის პასუხისმგებლობა არ უნდა მოჰყოლოდა.
  • 2022 წლის ივნისის დასკვნაში საქართველოს ევროკავშირში გაწევრიანებაზე განაცხადის შესახებ, ევროკომისიამ მოითხოვა, რომ "მედიის მფლობელების წინააღმდეგ აღძრული სისხლის სამართლის პროცედურები შეესაბამებოდეს უმაღლეს საკანონმდებლო სტანდარტებს".

მიმართვას ხელს აწერს ევროპის ჟურნალისტთა ასოციაცია (AEJ), პრესისა და მედიის თავისუფლების ევროპული ცენტრი (ECPMF), ევროპის ჟურნალისტთა ფედერაცია (EFJ), პრესის საერთაშორისო ინსტიტუტი (IPI), რეპორტიორები საზღვრებს გარეშე (RSF).

  • ხელმომწერთა სრული სია შეგიძლიათ იხილოთ ბმულზე.

კონტექსტი: მთავარი არხის დამფუძნებელი 2022 წლის 16 მაისიდან მაუწყებლის დირექტორის თანამდებობაზე უფლებამოსილების სავარაუდო გადამეტებისთვის სასჯელს იხდის.

  • მას 3.5 წლით თავისუფლების აღკვეთა აქვს მისჯილი.