ცუგამ და თხამ, რომლებიც დაბადებიდან საუკეთესო მეგობრები არიან, ახალი სახლი იპოვეს. წლების განმავლობაში ისინი სამხრეთ კაროლინაში მზრუნველ პატრონთან ერთად ცხოვრობდნენ, რომელიც ავადმყოფობის გამო მათ მოვლას ვეღარ ახერხებდა, ამიტომ ცუგა და თხა თავშესაფარში წაიყვანა.

თავშესაფარში ცხოვრების პერიოდში ყველამ შენიშნა, რომ ცუგას და თხას ერთმანეთთან დაშორება არ სურდათ და მთელ დღეს ერთად ატარებდნენ. ვეტერინარების თქმით, როცა ძაღლს აცრებს უკეთებდნენ, თხა მის გვერდით იწვა და მარტო არასდროს ტოვებდა.

ფოტო: Twitter

თავშესაფრის თანამშრომლებს ცუგას და თხის დაშორება არ სურდათ, თუმცა მათი თქმით, თხის მოვლისთვის საჭირო პირობები არ ჰქონდათ, რადგან დაწესებულება პატარა ზომის ცხოველებზე იყო გათვლილი. თავშესაფრის წარმომადგენლებმა დახმარება პარტნიორებს და სხვა თავშესაფრებსაც სთხოვეს, მოგვიანებით კი ფერმერი გამოჩნდა, რომელმაც ცუგა და თხა თავის ფერმაში წაიყვანა.

ფოტო: Twitter

ფერმერის თქმით, ცუგა და თხა ახალ საცხოვრებელს უკვე შეეჩვივნენ და თავს კარგად გრძნობენ. ასე რომ, საუკეთესო მეგობრები კვლავ ერთად დარჩნენ და მთელ დღეებს თამაშში ატარებენ.