ვლადიმერ კარა-მურზას რუსეთის სასამართლომ დღეს 25 წლით პატიმრობა მიუსაჯა, რომელსაც მკაცრი რეჟიმის გამოსასწორებელ კოლონიაში მოიხდის.

რატომ არის მნიშვნელოვანი: მედიის განცხადებით, დაკავებამდე რამდენიმე საათით ადრე, მას ჰქონდა CNN-თან ინტერვიუ და რუსეთის მთავრობას "მკვლელების რეჟიმი" უწოდა.

  • BBC-ის ცნობით, პოლიტიკოსი და ყოფილი ჟურნალისტი რუსეთის უკრაინაში შეჭრას აკრიტიკებდა.
  • იგი დამნაშავედ ცნეს ღალატში, რუსული არმიის შესახებ ცრუ ინფორმაციის გავრცელებაში და არასასურველ ორგანიზაციასთან კავშირში.
  • პოლიტიკოსმა ყველა ბრალდება უარყო.
  • მედიის ცნობით, კარა-მურზა უკანასკნელია პუტინის რამდენიმე ოპონენტიდან, რომელიც დააკავეს ან იძულებული გახდა, რუსეთი დაეტოვებინა.

დეტალები: ევროკავშირი კატეგორიულად გმობს მოსკოვის სასამართლოს გადაწყვეტილებას, მიუსაჯოს 25-წლიანი პატიმრობა დემოკრატიისთვის მებრძოლ ოპოზიციონერ პოლიტიკოსსა და კრემლის კრიტიკოსს, ვლადიმირ კარა-მურზას, პოლიტიკურად მოტივირებული ბრალდებების საფუძველზე.

  • მათი თქმით, სასამართლოს დღევანდელი აღმაშფოთებელი გადაწყვეტილება კიდევ ერთხელ ცხადყოფს სასამართლო სისტემის ბოროტად გამოყენებას პოლიტიკურ აქტივისტებზე, უფლებადამცველებზე და ნებისმიერ ხმაზე, რომელიც ეწინააღმდეგება რუსეთის უკანონო, აგრესიულ ომს უკრაინის წინააღმდეგ.
  • ამბობენ, რომ ეს პროცესი არ აკმაყოფილებდა კომპეტენტური, მიუკერძოებელი და დამოუკიდებელი სასამართლოს მიერ სამართლიანი და საჯარო განხილვის საერთაშორისო სტანდარტებს — სასამართლო სხდომები დამკვირვებლებისთვის მიუწვდომელი იყო.
  • ევროკავშირის განცხადებით, რუსეთმა უნდა უზრუნველყოს სათანადო ჯანდაცვის ხელმისაწვდომობა ვლადიმერ ყარა-მურზასა და ციხეში მყოფი ყველა დანარჩენისთვის.
  • ევროკავშირი სოლიდარობას უცხადებს ყველა იმ რუსს, ვისაც დევნიან, აპატიმრებენ ან აშინებენ ადამიანის უფლებებისთვის ბრძოლის, სიმართლის თქმისა და რეჟიმის კრიტიკის გამო.
  • მოუწოდებენ რუსეთს, დაუყოვნებლივ და უპირობოდ გაათავისუფლოს ყველა, ვინც პოლიტიკურად მოტივირებული ბრალდებებით არის დაკავებული.
  • "ჩვენ ასევე მოვუწოდებთ რუსეთს გააუქმოს თავისი მჩაგვრელი კანონმდებლობა, მათ შორის, კანონები, რომლებიც ცენზურას ადებს უკრაინის წინააღმდეგ რუსეთის ომის შესახებ ჭეშმარიტ ინფორმაციას
  • ასევე კანონებს ე.წ. უცხოური აგენტების და არასასურველი ორგანიზაციების შესახებ, რომლებიც გამოიყენება მხოლოდ სამოქალაქო საზოგადოებისა და დამოუკიდებელი ხმების ჩასახშობად", — ნათქვამია განცხადებაში.