ვალერიან მუნჯიშვილი, რომლის თქმითაც ის 18 მაისს თბილისში, საკუთარ სახლთან ახლოს საყურის ტარებისთვის სცემეს, On.ge-სთან ინტერვიუში ამბობს, რომ უკმაყოფილოა გამოძიების მიმდინარეობით.

ვალერიან მუნჯიშვილის შესახებ On.ge-მ 2016 წლის მაისში დაწერა. მაშინ ის ვინაობის გამჟღავნებისგან თავს იკავებდა, რადგან ამბობდა, რომ ოჯახის წევრებმა არ იცოდნენ ამ ფაქტის შესახებ და მათ მოუფრთხილდა.

ეს ის შემთხვევაა, როცა შიში ავიკიდე. ჩემი სახლიდან 100 მეტრის მოშორებით, ჩემს უბანში დამესხნენ თავს და მაქვს შიშისა და დაუცველობის შეგრძნება.

ვალერიან მუნჯიშვილი

მუნჯიშვილმა განგვიცხადა, რომ შემთხვევა თემქაზე, 18 მაისს მოხდა, რა დროსაც დაუზიანდა კბილი და მიიღო მსუბუქი დაზიანება, რის შემდეგაც საავადმყოფო მალევე დატოვა:

"მოვდიოდი ჩემთვის. საერთოდ ვატარებ საყურეს, მეცვა წითელი შარვალი. ორმა პირმა ჩამიარა, რომლებიც გამომელაპარაკნენ და მითხრეს, რატომ მეკეთა საყურე და ვიყავი თუ არა 17 მაისს ლგბტ პირთა აქციაზე. ამას მოჰყვა შეურაცხმყოფელი, უხეში შელაპარაკება და ხელით შეხება, მათ მცემეს. პოლიცია არ გამომიძახებია, ჩემი ფეხით მივედი საავადმყოფოში, რადგან მეგონა, ტვინის შერყევა მქონდა".

დღეს, 6 ივნისს, ის ამბობს, რომ დაკითხულია, თუმცა გამოძიება წინ არ მიდის:

„სანამ მე არ დავურეკე და თავი არ შევახსენე, არც შემხმიანებიან. ცემიდან მალევე წამიყვანეს ექსპერტიზაზე სამხარაულში. მაქვს ყველა ცნობა, მათ შორის კლინიკიდან, მაქვს ექსპერტ კრიმინალისტების დასკვნაც. გამომძიებელმა მითხრა, პროკურატურას მოვთხოვ, დაზარალებულის სტატუსი მოგანიჭონო, მაგრამ ამ დრომდე არ ჩანს”.

ვალერიან მუნჯიშვილის თქმის, ის გაჩერებას არ აპირებს და ბოლომდე იბრძოლებს საკუთარი უფლებების დასაცავად:

„ეს ის შემთხვევაა, როცა შიში ავიკიდე. ჩემი სახლიდან 100 მეტრის მოშორებით, ჩემს უბანში დამესხნენ თავს და მაქვს შიშისა და დაუცველობის შეგრძნება. რა გარანტია მაქვს, რომ კიდევ არ განმეორდება? მით უმეტეს, აქ ყველამ გაიგო, ყველა ყველას იცნობს, პოლიციას და არასამთავრობოებსაც არ აინტერესებთ მომხდარი“.

როგორც ვალერიან მუნჯიშვილმა On.ge-ს უთხრა, ის დამალვას არ აპირებს და სურს, თავისი ბრძოლით მაგალითი სხვებსაც მისცეს.

ჩვენ დავუკავშირდით შინაგან საქმეთა სამინისტროს, სადაც განგვიცხადეს, რომ გამოძიება დაწყებულია ვალერიან მუნჯიშვილის ცემის ფაქტზე სისხლის სამართლის კოდექსის 125-ე მუხლის მიხედვით. ამჟამად მიმდინარეობს საგამოძიებო მოქმედებები, მათ შორის ექპერტიზა და უწყება სწორედ ამ ექსპერტიზის პასუხებს ელოდება.