ცხენირემი ალასკის ყველაზე დიდი საავადმყოფოს კარს მიადგა, შევიდა და ფოიეში მდგარი ყვავილების ღეჭვა დაიწყო. სოციალურ მედიაში გავრცელებულ ვიდეოში ჩანს, რომ ცხენირემი ყვავილების ღეჭვით ისეა გართული, საავადმყოფოს დაცვას ზედაც არ უყურებს.

"ცხენირმები მთელი წლის განმავლობაში გვსტუმრობენ, ზაფხულს თვეებში კი დათვებსაც ვხედავთ, თუმცა ეს პირველი შემთხვევაა, რომ ცხენირემი საავადმყოფოს შენობაში შემოვიდა", — განაცხადა საავადმყოფოს თანამშრომელმა. რადგან საავადმყოფოს ავტომატური კარი აქვს, ცხენირემს შიგნით შეღწევა არ გასჭირვებია.

საავადმყოფოს შესასვლელში დაცვასთან და თანამშრომლებთან ერთად პაციენტებიც იმყოფებოდნენ, თუმცა ცხენირმის არავის შეშინებია. როგორც ვიდეოდან ჩანს, ცხენირემი ძალიან მშვიდია, გარშემომყოფებს ყურადღებას არ აქცევს და მხოლოდ ყვავილი აინტერესებს. ცოტა ხნის შემდეგ ცხენირემი საავადმყოფოდან უსაფრთხოდ გაიყვანეს.

ალასკას ცხოველთა დაცვის დეპარტამენტი ადგილობრივებს აფრთხილებს, ცხენირმების დანახვის შემთხვევაში, მათგან თავი შორს დაიჭირონ. მართალია, ისინი საკმაოდ მეგობრულები ჩანან, თუმცა ზოგიერთი ცხენირემი შესაძლოა დაფრთხეს და საშიში გახდეს. გარდა ამისა, შემოდგომაზე ცხენირმები მეტი აგრესიულობით გამოირჩევიან, გაზაფხულსა და ზაფხულზე კი უფრო მშვიდები არიან. ამის მიუხედავად, არ არის გამორიცხული, რომ ცხენირემი მიახლოების შემთხვევაში ადამიანს თავს დაესხას.