ამის შესახებ ადვოკატმა, ლიკა ბითაძემ TV პირველს განუცხადა.

რატომ არის მნიშვნელოვანი: რუსული კანონის საწინააღმდეგო აქციის მონაწილე, 21 წლის ლაზარე გრიგორიადისი პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.

  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.
  • მმართველი გუნდის თავმჯდომარემ გრიგორიადისს "გზას აცდენილი კაცი" უწოდა და თქვა, რომ მას "ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.
  • გრიგორიადისის ადვოკატმა სააპელაციო სასამართლოს 2 აპრილს მიმართა და პატიმრობის გირაოთი შეცვლა მოითხოვა.

დეტალები: ადვოკატის თქმით, სააპელაციო სასამართლოსგან უარი გუშინ მიიღეს.

  • "სააპელაციო სასამართლომ დაცვის მხარის საჩივარი დაუშვებლად ცნო. განჩინება გამოგზავნილია, ჯერ ჩვენამდე მოსული არ არის. გავეცნობით და გიპასუხებთ, რა საფუძვლებით დატოვა ძალაში პატიმრობა. ამ ეტაპზე დაცვის მხარე ფიქრობს, რომ საქმეში მტკიცებულებები არ არსებობს, რომ დადგეს გამამტყუნებელი განაჩენი", — ამბობს ბითაძე.