ამის შესახებ ლიკა ბითაძემ მისი დაცვის ქვეშ მყოფი აქტივისტის მონახულების შემდეგ ისაუბრა.

რატომ არის მნიშვნელოვანი: რუსული კანონის საწინააღმდეგო აქციის მონაწილე, 21 წლის ლაზარე გრიგორიადისი პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.

  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.
  • მმართველი გუნდის თავმჯდომარემ გრიგორიადისს "გზას აცდენილი კაცი" უწოდა და თქვა, რომ მას "ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.

დეტალები: ადვოკატი დაკავებულის უფლებების დარღვევაზე საუბრობს.

  • ბითაძე ამბობს, რომ გრიგორიადისს აღიარებითი ჩვენება მუქარით და უფლებადამცველთან გასაუბრების გარეშე მიაცემინეს.
  • "უთხრეს, დაერეკა ადვოკატისთვის და რომ აკრიფა ტელეფონის კოდი, გამოგლიჯეს ხელიდან. უნდოდათ კოდის გაგება. [...] ამბობს, რომ თუ მე ჩვენებას არ მივცემდიო და ეს, რა თქმა უნდა, უნდა ყოფილიყო აღიარებითი ჩვენებაო, მაგ შემთხვევაში დააკავებდნენ ჩემს მეგობარ გიორგი ჯარიაშვილსო".