შინაგან საქმეთა მინისტრის, გიორგი მღებრიშვილის მტკიცებით, ვიდეოკამერების ამოღებულ ჩანაწერებში, იმ ადგილებზე, რომლებსაც თბილისიდან გატაცებული აზერბაიჯანელი ჟურნალისტი ასახელებს, საერთოდ არ ფიქსირდება პოლიციის ტანსაცმლიანი ადმიანის მოძრაობა. ამის შესახებ მღებრიშვილმა გაზეთ პრაიმტაიმთან ინტერვიუში განაცხადა.

"საერთოდ, როგორ ფიქრობთ, მოვლენათა ყველაზე წარმოუდგენელი განვითარების შემთხვევაშიც, კრიმინალური პოლიცია, თავისი ფორმით, იტაცებს ადამიანს დღისით-მზისით, ქალაქის ცენტრში და ამას ვერავინ ხედავს. ამ ვერსიას თეორიულადაც კი ვერ დავუშვებ", - ამბობს მინისტრი.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.

გაიგეთ მეტი: აფგან მუხტარლის საქმე