რუსეთის პროპაგანდისტული მედიის, TACC-ის ინფორმაციით პუტინმა რუსეთის საგარეო პოლიტიკის განახლებულ კონცეფციას ხელი დღეს მოაწერა.

რატომ არის მნიშვნელოვანი: დოქტრინაში მიმოხილულია რუსეთის მსოფლიო როლი, უსაფრთხოების უზრუნველყოფის საფუძვლები, საერთაშორისო ურთიერთობები, ეკონომიკა, ხოლო დიდი ნაწილი ეთმობა ევროპასთან ურთიერთობებს.

  • დოკუმენტის მიხედვით, რუსეთი საერთაშორისო რისკების მთავარ წყაროდ ვაშინგტონის კურსს მიიჩნევს.
  • ამასთანავე, თავს არ მიიჩნევს დასავლეთის მტრად და მისგან არ იზოლირდება.
  • რუსეთი განსაკუთრებით მნიშვნელოვნად ჩინეთთან და ინდოეთთან მეგობრობას მიიჩნევს, ამასთანავე, გეგმავს ირანთან, თურქეთთან, საუდის არაბეთთან, ეგვიპტესთან და სირიასთან ურთიერთობის გაღრმავებას.

დეტალები: კონცეფცია უშიშროების საბჭოზე რუსეთის საგარეო საქმეთა მინისტრმა, სერგეი ლავროვმა წარადგინა.

  • კონცეფციის თანახმად, მსოფლიო ქვეყნების უმრავლესობა რუსეთთან კონსტრუქციული ურთიერთობითაა დაინტერესებული და გადაწყვეტილი აქვს არსებობის უფლება ყველა გზით შეინარჩუნოს.
  • მათ შორის, რუსეთის ფედერაცია მიზნად ისახავს საზღვარგარეთ მცხოვრები რუსების უფლებებისა და თავისუფლების ეფექტურ დაცვას.
  • რუსეთი თავის საგარეო პოლიტიკას ახასიათებს, როგორც "მშვიდობისმოყვარეს, ღიას, პროგნოზირებადს და სამართლის ნორმებზე დაფუძნებულს".
  • ასევე, მოსკოვი "მხარს უჭერს" საერთაშორისო ძალისხმევას უნივერსალური და ტრადიციული სულიერი და მორალური ფასეულობების დასაცავად.