საქართველოს მორაგბეთა ეროვნულმა ნაკრებმა ამერიკის შეერთებული შტატების ნაკრები სტუმრად ისტორიაში პირველად დაამარცხა, ანგარიშით 21:17.

პირველი ტაიმის ბოლოს ანგარიში საქართველოს სასარგებლოდ 18:3 იყო, შესვენების შემდეგ ქართველმა მორაგბეებმა კიდევ 3 ქულა მოიპოვეს.

მეორე ტაიმში აშშ-ს ნაკრებმა ორი საპასუხო ლელო დადო, რამაც დასკვნით წუთებს დაძაბულობა შემატა, თუმცა ამერიკელი "არწივების" ბოლო მცდელობა საქართველოს ნაკრებმა წარმატებულად მოიგერია.

შეხვედრა ჯორჯიის შტატში გაიმართა. ქართველების საქომაგოდ ტრიბუნებზე ემიგრანტები მრავლად შეიკრიბნენ და საქართველოს ქართული შეძახილებით ამხნევებდნენ.

ქართული რაგბის ინფორმაციით, საქართველოს მორაგბეთა ნაკრებმა აქამდე ამ გუნდთან 4-ჯერ ითამაშა. მათგან 2-ჯერ შეხვედრა ამერიკაში შედგა და ორივეჯერ საქართველოს ნაკრების დამარცხებით დასრულდა.