შინაგან საქმეთა სამინისტროს განცხადებით, გორში, ვიცე-მერის სახლში მომხდარ ყაჩაღობის ფაქტზე, გამოძიებით დადგინდა, რომ პირმა, რომელიც, დაახლოებით, სამი წელია, იქ ძიძად მუშაობს, ოჯახიდან, რამდენიმე თვის წინ, ფარულად წამოიღო ოქროს ნივთები.

შსს-ს ცნობით, ძიძამ დაკითხვისას აღიარა, რომ საძინებელ ოთახში მდგარი ტანსაცმლის კარადიდან გადმოიღო ჩანთა, სადაც მოთავსებული იყო ოქროს ნივთები. მათი ნაწილი ჩანთიდან ამოიღო, ხოლო დანარჩენი - კარადის თავზე დამალა.

შსს-ს ინფორმაციით, ბრალდებულმა ძიძამ ბინიდან წამოღებული ოქროს ნივთები ლომბარდში ჩააბარა. ხოლო, იმის გამო, რომ ლომბარდიდან ოქროს ნივთების გამოხსნა ვერ შეძლო, ყაჩაღობის ინსცენირება მოაწყო.

"2017 წლის 15 ივნისს, დაახლოებით, 16 საათზე, ძიძამ საძინებელ ოთახსა და ლოჯიაში მდგარი კარადებიდან იატაკზე გადმოყარა ტანსაცმელი და სხვა ნივთები, შემოსასვლელ კართან კი ოქროს სამკაულის შესანახი ნაჭრის პატარა ტომრები დაყარა. შემდეგ მისაღები ოთახის კედელს თავი დაარტყა, რა დროსაც შუბლის არეში დაზიანება მიიყენა, საძინებელ ოთახში გავიდა, იატაკზე, ბავშვების საწოლთან დაჯდა და ოჯახის დიასახლისის მოსვლას დაელოდა. სახლში დაბრუნებულ დიასახლისს მან მოატყუა, თითქოს თავს ყაჩაღები დაესხნენ", - ნათქვამია შსს-ს განცხადებაში.

შსს-ს გორის რაიონულ სამმართველოში აღნიშნულ ფაქტზე ინტენსიური საგამოძიებო მოქმედებები მიმდინარეობს. შსს-ს განცხადებით, ძიძა აღიარებს ჩადენილ დანაშაულს. უახლოეს პერიოდში, საქმეზე მოხდება კვალიფიკაციის შეცვლა შესაბამისი მუხლით.