რა მოხდა: 22 მარტს, პარლამენტის პლენარულ სხდომათა დარბაზში ანტიდასავლური, პრორუსული და ქართული ოცნებისგან ფორმალურად გამიჯნული ხალხის ძალის დეპუტატმა, ვიქტორ ჯაფარიძემ ოპოზიციონერ ტარიელ ნაკაიძეს მიკროფონი ჩაარტყა.

• On.ge-სთან საუბარში ნაკაიძე ამბობს, რომ პრორუსი დეპუტატები მას აგენტს უწოდებდნენ, საპასუხოდ კი ის განმარტებას ითხოვდა და ეუბნებოდა, თავად იყვნენ რუსული კანონის მიმღები მოღალატეები.
• "არგუმენტების არქონამ პოლიტიკაში ამ ძალადობამდე მიიყვანა. გაუნათლებელია, ხსნი მიკროფონს და გირტყამს. არ აქვს არგუმენტი, რომ გესაუბროს", — ამბობს ნაკაიძე ჯაფარიძეზე.

რა თქვა კობახიძემ: "ოცნების" დეპუტატი ოპონენტების ლანძღვასა და ფიზიკურ შეურაცხყოფას ამჯერადაც ამართლებს.

• ირწმუნება, რომ ტარიელ ნაკაიძეს" მძიმე რეპუტაცია აქვს, თუმცა ჟურნალისტების კითხვაზე, განემარტა, რა იგულისხმა, კობახიძემ თქვა, რომ არ უნდა და არ განმარტავს.
• "როდესაც ტარიელ ნაკაიძე, მძიმე რეპუტაციის კაცი, სხვა კოლეგებს უწოდებს მოღალატეებს, მის მიმართ რომ ვერ ექნებათ ხავერდოვანი დამოკიდებულება კოლეგებს, ეს არის ჩემთვის გასაგები".
• "უხერხული თემაა, სენსიტიური თემაა და არ განვმარტავ ამიტომ", — ამატებს ის.
• მისივე თქმით, ტარიელ ნაკაიძე პარლამენტში კუთხეში უნდა იდგეს.
• "მძიმე რეპუტაცია — ეს ერთი, სხვა კოლეგებს უწოდა მოღალატე, ეს მეორე, კუთხეში დგომა ეკუთვნის, თუ აქვს ელემენტარული სინდისი ამ კონკრეტულ დეპუტატს".

ნაკაიძის პასუხი: ოპოზიციონერი დეპუტატი, რომელიც წარსულში ქართველ მუსლიმთა კავშირის თავმჯდომარე იყო და პარლამენტში რელიგიური უმცირესობების უფლებებს იცავს, On.ge-სთან საუბარში, ქართული ოცნების თავმჯდომარის განცხადებაში ქსენოფობიურ კონტექსტს ხედავს.

• "ჩემი რეპუტაცია, მართალია, მძიმეა, რადგან ისინი, ზოგადად, რელიგიური და ეთნიკური უმცირესობების მიმართ არიან არასწორი პოზიციით და მე ყოველთვის ჩემი ცხოვრების მანძილზე ვიცავდი რელიგიური და ეთნიკური უმცირესობების უფლებებს".
• ნაკაიძე ამბობს, რომ ქართულ ოცნებას პოლიტიკურ სივრცეში ყველანაირი არგუმენტი გამოელია, ამიტომ ოპონენტებისთვის ლაფის გადასხმაზე გადავიდა.
• "ეს არ გამოუვათ. პირიქით, ეს ჩემ რეპუტაციაზე უფრო დადებითად მუშაობს იმ საზოგადოებაში, რომელსაც წარმოვადგენ. ამათ უნდათ, რომ გავჩუმდე, უმცირესობებთან დაკავშირებით არ ვისაუბრო, მაგრამ ნურას უკაცრავად. აუცილებლად ვიქნები შეუპოვარი მებრძოლი ჩვენი ქვეყნის მრავალფეროვნების განმტკიცებისთვის".
• ის ფიქრობს, რომ ხელისუფლებას რელიგიური და ეთნიკური უმცირესობები "საფრთხისშემცველ ელემენტებად" ჰყავს მონიშნული.
• "ქართველი ხალხის მიერ თავად კუთხეშია მიყენებული, გაფარჩაკებული ეს პარტია. სახეახდილი ირაკლი კობახიძე, ვერა და ვერ აცნობიერებს, ვისთან რა უნდა ისაუბროს. საკუთარ თანაგუნდელს უთხრას, რომ არასწორად მოიქცა და სამარცხვინო საქციელი ჩაიდინა. ესენი ბიძინას გულისთვის გაყიდიან ყველაფერს, საკუთარ მშობლებს", — ამბობს ნაკაიძე.