ინფორმაციას მედიაზონა ავრცელებს.

რატომ არის მნიშვნელოვანი: ქართული ლეგიონის წევრები უკრაინის შეიარაღებული ძალების მხარეს იბრძვიან, ჯგუფი ძირითადად ყოფილი ქართველი სამხედროებისგან შედგება, რომლებსაც შეიარაღებული კონფლიქტების გამოცდილება აქვთ.

  • უკრაინაში რუსეთის წინააღმდეგ საქართველოს 2 000-მდე მოქალაქე იბრძვის, უმეტესობა ქართული ლეგიონის წევრია.
  • ჯგუფის მეთაურმა, Current Time-თან ინტერვიუში განაცხადა, რომ ქართული ლეგიონი უკრაინაში ყველაზე დიდი უცხოური ფორმირებაა.

დეტალები: საქმის მოსმენა 3 მარტს გაიმართა, თუმცა ინფორმაცია სასამართლოს ფაილებში გუშინ გამოჩნდა.

  • მოსკოვის ბასმანის რაიონულმა სასამართლომ დაკავების განაჩენი დაუსწრებლად მიიღო და მებრძოლებს 30 წლით თავისუფლების აღკვეთა მიუსაჯა.
  • მოსკოვში მებრძოლებს რუსეთ-უკრაინის ომში დაქირავებულ მონაწილეობას ედავებიან.

ქართული ეროვნული ლეგიონის მეთაურმა, მამუკა მამულაშვილმა რადიო თავისუფლებასთან საუბარში განაცხადა, რომ რუსეთში ლეგიონის 24 მებრძოლის წინააღმდეგ სისხლის სამართლის საქმეა აღძრული.

  • მამულაშვილი ამბობს, რომ მორალური თვალსაზრისით მოსკოვის სასამართლოს გადაწყვეტილება მებრძოლებისთვის არაფერს ნიშნავს.
  • თუმცა, არ გამორიცხავს, რომ საქართველოს მთავრობამ, რუსეთის ხელისუფლებასთან თანამშრომლობით, მებრძოლები საქართველოში დაბრუნების შემდეგ მოსკოვში გადაიყვანოს.
  • "ალბათ საქართველოს ხელისუფლებას აქვს რაიმე სახის ტრანსფერის ხელშეკრულება. მაინტერესებს საქართველოს ხელისუფლების პოზიცია (მოსკოვის სასამართლოს გადაწყვეტილებასთან დაკავშირებით)", — განუცხადა მამულაშვილმა რადიო თავისუფლების ქართულ სამსახურს.
  • "ჩვენ ამით [სასამართლოს გადაწყვეტილებით] ვერ დაგვაშინებენ, რუსულმა ტყვიამ ვერ დაგვაშინა", განაცხადა ლეგიონის წევრმა, ლაშა რუხაიამ TV პირველთან საუბრისას.