ინფორმაციას პროკურატურა ავრცელებს.

რატომ არის მნიშვნელოვანი: უწყების განცხადებით, 2020 წლის 8 თებერვალს, შსს-ს დაცვის პოლიციის დეპარტამენტის თანამშრომელმა, ფსიქიკური ჯანმრთელობისა და ნარკომანიის პრევენციის ცენტრის ადმინისტრაციულ შენობაში, მეთადონით ჩანაცვლებითი თერაპიის პროცესის მიმდინარეობისას, სამსახურებრივი მოვალეობის შესრულებისას, უფლებამოსილებას გადაამეტა.

  • ურთიერთშელაპარაკების ნიადაგზე, საჯარო სივრცეში, მოქალაქეების თანდასწრებით, ფიზიკური შეურაცხყოფა მიაყენა ამავე ცენტრის ბენეფიციარს, რითაც შეილახა დაზარალებულის პირადი ღირსება, ასევე დაირღვა მისი და სახელმწიფოს კანონიერი ინტერესები.

დეტალები: პროკურატურის განცხადებით, სასამართლო განხილვისას ბრალდებულს არაერთხელ შესთავაზეს პირობით მსჯავრზე საპროცესო შეთანხმების გაფორმება მიუხედავად იმისა, რომ ბრალად წარდგენილი ქმედება დადასტურებული იყო და დანაშაულის ჩადენის ფაქტი ასახული იყო ვიდეოჩანაწერზე.

  • "დაზარალებული თანახმა იყო ბრალდებულის მიმართ კანონით გათვალისწინებული ნებისმიერი შეღავათების, თუნდაც პირობითი მსჯავრის გამოყენებაზე, თუმცა ბრალდებულმა უარი განაცხადა საპროცესო შეთანხმებაზე და საქმის არსებითი განხილვა მოითხოვა", — აცხადებს უწყება.
  • მას ბრალი სისხლის სამართლის კოდექსის 333-ე მუხლის მესამე ნაწილის "ბ" და "გ" ქვეპუნქტებით (სამსახურებრივი უფლებამოსილების გადამეტება ძალადობით და დაზარალებულის პირადი ღირსების შეურაცხყოფით) წარედგინა.
  • საქალაქო სასამართლომ ბრალდებული დამნაშავედ ცნო და სასჯელის სახედ და ზომად 6 წლით თავისუფლების აღკვეთა განუსაზღვრა.