ამის შესახებ ექსპრეზიდენტი სოციალურ ქსელში წერს.

რატომ არის მნიშვნელოვანი: გიორგი მარგველაშვილმა განაცხადა, რომ ქართული ოცნება არის რუსეთის ხელისუფლების დღის წესრიგით მოქმედი ჯგუფი და აქედან გამომდინარე, პოლიტიკური მიზანი არის რიგგარეშე საპარლამენტო არჩევნები.

  • "იმისთვის, რომ ეს მოხდეს, მთავარი, რაც ჩვენ უნდა გავაკეთოთ ისაა, რომ ვაჩვენოთ ქართულ საზოგადოებასა და ჩვენ პარტნიორებს რა მოდელით, რა ფორმატით მოხდება მშვიდობიანად ხელისუფლების გადაბარება და ეს არ გამოიწვევს არავითარ დაძაბულობას და არეულობას", — თქვა მარგველაშვილმა.
  • მიხეილ სააკაშვილი წერს, რომ გიორგი მარგველაშვილის პოზიციას იზიარებს.
  • "არ უნდა დაგვავიწყდეს, რომ ძალიან სახიფათო გეოპოლიტიკურ გარემოში ვიმყოფებით. ამიტომ, მოწინააღმდეგეზე უფრო ორგანიზებული, მოქნილი უნდა ვიყოთ და ხალხმა ხელიდან არ უნდა გაუშვას ინიციატივა", — ამბობს სააკაშვილი.
  • მისივე განცხადებით, ქართულ პოლიტიკაში მონაწილეობას არ გეგმავს და არ აქვს პრეტენზია, რომ გამოსავლის ზუსტ რეცეპტს ფლობს.

დეტალები: ამბობს, რომ ყოველი დღე რუსების ყოფნისა საპარლამენტო უმრავლესობაში, ძალიან საშიშია საქართველოსთვის, ამიტომ ყველას სჭირდება დიალოგი და მოსმენა, ურთიერთშეთანხმება.

  • სააკაშვილის თქმით, პოლიტიკოსებს სჭირდებათ მეტი რწმენა საკუთარ თავში და ხალხის გამარჯვებაში.
  • "ცოტა მიამიტობაა, თუ ვინმეს ჰგონია, რომ რაიმე პროგრესი შეიძლება იქნეს მიღწეული რიგგარეშე არჩევნების გარეშე, ან გარდამავალი ეროვნული თანხმობის მთავრობის გარეშე", — წერს ექსპრეზიდენტი.
  • ამბობს, რომ ივანიშვილის მთავარი ამოცანა, რიგგარეშე არჩევნებიდან სხვა თემებზე ყურადღების გადატანაა.
  • მისი თქმით, ახლა პოლიტიკური მიმოხილვების დრო არაა, ყველა მუდმივად უნდა ეძებდეს გამოსავალს და იმაზე მალე იპოვიან, ვიდრე ჰგონიათ.
  • "აუცილებლად გვჭირდება საკოორდინაციო საბჭო. გვახსოვდეს ყველას, რომ ოლიგარქმა აირჩია წაგებული ბანაკი რუსეთის სახით და ესეც ამყარებს ხალხის პოზიციებს და აჩქარებს მის გამარჯვებას", — წერს სააკაშვილი.
  • ექსპრეზიდენტის განცხადებით, ევროპარლამენტის წევრთა უმრავლესობა საქართველოს მიანიშნებდა, რომ რიგგარეშე არჩევნები არის ერთადერთი გადარჩენა.