საქართველოს პრეზიდენტის საგარეო ურთიერთობათა მდივანი თენგიზ ფხალაძე აცხადებს, რომ ევროპარლამენტის საკმაოდ მკაცრი რეზოლუცია, აფგან მუხტარლის საქმესთან დაკავშირებით, ბევრ კრიტიკას შეიცავს და მიიჩნევს, რომ აღნიშნული საკითხი რაც შეიძლება ეფექტიანად უნდა იქნეს შესწავლილი.

"ჩვენთვის მნიშვნელოვანია, რომ რაც შეიძლება სწრაფად, რაც შეიძლება ეფექტიანად იქნას აღნიშნული საკითხი შესწავლილი რათა ჩვენი პარტნიორებისათვის ნათელი იყოს სურათი და თავიდან იქნას აცილებული არა მხოლოდ კრიტიკა, არამედ ის, რამაც მსგავსი კრიტიკა გამოიწვია", - განაცხადა ფხალაძემ.

სტრასბურგში ევროპარლამენტის პლენარულ სესიაზე, ევროპარლამენტმა აფგან მუხტარლის საქმეზე რეზოლუცია მიიღო, სადაც აზერბაიჯანს დაკავებული ჟურნალისტის გათავისუფლებისკენ, საქართველოს კი გამჭვირვალე გამოძიებისკენ მოუწოდებენ.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს, რასაც საქართველოს ხელისუფლება უარყოფს. შსს ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.