სომხურმა კომპანიამ, J.M.S.-მა, საქართველოს რუკის ორი ოკუპირებული რეგიონის, აფხაზეთისა და ცხინვალის, გარეშე გავრცელებისთვის ბოდიში მოიხადა და განაცხადა, რომ აღნიშნულ ბანერს უახლოეს მომავალში გამოცვლის.

აღნიშნული კომპანიის დირექტორი არსენ სუკიასიანი აცხადებს, რომ J.M.S. ამერიკული კომპანია Enterprise Rent-A-Car-ის წარმომადგენელია სომხეთში.

გაეროში საქართველოს ახალგაზრდობის წარმომადგენელი გიორგი ტუმასიანი ბანერის მოხსნის მიზნით აღნიშნული კომპანიის ხელმძღვანელობას დაუკავშირდა და დირექტორის ოფიციალური განმარტებითი წერილი მიიღო.

პრობლემის მოგვარებაზე ასევე მუშაობდა საგარეო საქმეთა სამინისტრო და სომხეთში საქართველოს ელჩი გიორგი საგანელიძე

ფოტო: გიორგი ტუმასიანი / Facebook

"ჩვენი განზრახვა იყო საქართველოს ზოგადი რუკის განთავსება, რომელზეც არ იქნებოდა მოცემული დეტალები, არამედ რუკა დროშის სიმბოლიკით იქნებოდა მომზადებული. გუგლიდან ამ რუკის გადმოწერისას, ჩვენ არ მივაქციეთ ყურადღებას იმას, რომ ეს რუკა არ შეესაბამებოდა საქართველოს ოფიციალურ საზღვრებს. შესაბამისად, სურვილი მაქვს გულწრფელი ბოდიში მოვიხადო ამ ინციდენტისთვის და ამ წერილშივე განვაცხადო, რომ ზემოთაღნიშნული ბანერი მცდარი რუკით აღარ არის გამოფენილი ჩვენს ოფისზე" - წერია წერილში.

შპს J.M.S გენერალური დირექტორი არსენ სუკიასიანი აცხადებს, რომ სომხური კომპანია პატივს სცემს საქართველოს საერთაშორისოდ აღიარებულ საზღვრებს და შეცდომას შემთხვევითობას უწოდებს:

"ეს შეცდომა არავითარ შემთხვევაში არ წარმოადგენს არც ჩვენი კომპანიის და არც სომხური საზოგადოების ხედვას".

J.M.S-ის წარმომადგენლობა საგარეო საქმეთა მინისტრის, მიხეილ ჯანელიძის, მიმართ გაგზავნილ წერილში იუწყება, რომ უახლოეს დღეებში ახალ ბანერს იმ რუკის მითითებით დაამზადებენ, რომელსაც საქართველოს საელჩო სომხეთში მიაწოდებს.

რამდენიმე დღის წინ ფეისბუკზე გავრცელდა ფოტო, რომელშიც ჩანდა, რომ ამერიკული კომპანია Enterprise Rent-A-Car-ის ფრანშიზის მქონე სომხური კომპანიის, J.M.S.-ის, მიერ ტურისტებისთვის შექმნილ ბანერზე საქართველოს რუკა ოკუპირებული ტერიტორიების გარეშე იყო წარმოდგენილი.

განახლებული ბანერი