ამის შესახებ ხატია დეკანოიძემ და თამარ კორძაიამ პარლამენტში გამართულ ბრიფინგზე ისაუბრეს.

რატომ არის მნიშვნელოვანი: რუსული კანონის საწინააღმდეგო აქციის დასრულების შემდეგ მმართველ გუნდში ახალი მესიჯბოქსი გაჩნდა, რომელიც სტუდენტების დისკრედიტაციას ისახავდა მიზნად.

  • 12 მარტს, იმედის ეთერში ირაკლი ღარიბაშვილმა თქვა, რომ ფრანკლინის კლუბში, რომელიც საქართველოს უნივერსიტეტშია შექმნილი, ახალგაზრდებს "წამლავენ" და "ტვინს ურეცხავენ".
  • სტუდენტების წინააღმდეგ ამ პროპაგანდისტულ კამპანიას შეუერთდა ირაკლი კობახიძეც, რომელმაც თქვა, რომ სტუდენტების მობილიზაცია, როგორც UG-ს, ასევე, თავისუფალი უნივერსიტეტის ბაზაზე ხდება.

დეტალები: დეკანოიძისა და კორძაიას განცხადებით, მნიშვნელოვანია უნივერსიტეტებს სხვა უმაღლესმა სასწავლებლებმა გამოუცხადონ სოლიდარობა, რადგან თუ ასე არ მოხდა, ხვალ სხვა უნივერსიტეტსაც მიადგება ხელისუფლება.

  • მათივე თქმით, მათზე თავდასხმით ქართული ოცნება თავისუფალ სივრცეებზე შეტევას და შეზღუდვას ცდილობს.
  • "საქართველოს ახალგაზრდები ყოველთვის იქნებიან დემოკრატიის და მომავლის სადარაჯოზე. ეს დაამტკიცა იმ პროტესტმა, რომელიც ჩვენ ვიხილეთ".
  • "განათლებული, ნამდვილი, ძალიან პატრიოტი თაობა და ის ადამიანები, ვინც სწავლობენ, თან მუშაობენ პარალელურად, თან დოვლათ ქმნიან, თან განათლებას იღებენ, როგორც ჩანს, არის ძალიან დიდი საფრთხე ამ ხელისუფლებისთვის და ეს ამ ხელისუფლების პირველი ნაბიჯი ამ პროტესტის შემდეგ რაც იყო, იყო პირდაპირ დარტყმა განათლებაზე, უნივერსიტეტებზე, დარტყმა ფრანკლინის კლუბზე".
  • "ყველა ჩვენგანი, არამხოლოდ განათლების სფეროში, უნივერსიტეტები, სკოლები ან ზოგადად აკადემიური წრეები, ყველა ადამიანი უნდა იყოს სოლიდარული სტუდენტების, უნივერსიტეტები, პროფესორების და იმ სივრცეების, სადაც ახალგაზრდები და ბავშვები იღებენ თავისუფალ გარემოში ცოდნას".