ინფორმაციას ამის შესახებ ლანა გალდავა და ირაკლი კუპრაძე ავრცელებენ.

რატომ არის მნიშვნელოვანი: ახალი არ არის, რომ რუსული კანონის ინიციატორები ხშირად ესხმიან თავს დასავლელ პარტნიორებს, მათ შორის, ამერიკის ელჩს, კელი დეგნანს.

• ბოლო პერიოდში კი, კრიტიკაზე პასუხად, ქართული ოცნებისგან ფორმალურად გამიჯნული წევრების ანტიამერიკული და ანტიდასავლური გზავნილები კიდევ უფრო გააქტიურდა.
• ამ რიტორიკას არც ქართული ოცნების წევრები ჩამორჩებიან — მაგალითად, ღარიბაშვილმა 12 მარტს ინტერვიუში, რომელიც რუსული კანონის საწინააღმდეგო აქციის მონაწილეების მადისკრიდიტირებელი და პროპაგანდისტული განცხადებებით იყო გაჯერებული, ევროპარლამენტზე თქვა, რომ "მან ჯობია მიხედონ თავის თავს".
• ანტიდასავლური და პროპაგანდისტული რიტორიკა არაერთხელ გააკრიტიკეს თავად დასავლელმა პარტნიორებმა — მათ შორის, კელი დეგნანმა და ნედ პრაისმა.
• ეს წიგნიც, რომელიც პარლამენტში გამოჩნდა, სწორედ ანტიდასავლურ და ანტიამერიკულ გზავნილებს შეიცავს.

წიგნის ავტორად ალექსანდრე ქოჩიაშვილია მითითებული. მას სახელად "ლუციფერის მხილება" ჰქვია, ხოლო ყდაზე თავისუფლების ქანდაკებაა გამოსახული.

• როგორც ლელოს წევრები წერენ, მასზე არაა მითითებული გამომცემლობა, ტირაჟის გარეშეა გამოშვებული და მაღალი პოლიგრაფიით არის დაბეჭდილი.
• "სად ვართ საქართველო!!!" — დატანილია ყდაზე.
• სოციალურ ქსელში გავრცელდა შიდა გვერდების ფოტოებიც, სადაც ავტორი წერს, რომ წიგნს უძღვნის "ყველა მოტყუებულს, გაძარცვულსა და განწირულს, რათა მისმა შვილებმა გაიგონ, რომ ნეოლიბერალიზმის გზით სიარული ერის თვითმკვლელობაა".
• ავტორისავე სიტყვებით, წიგნი სხვებთან ერთად პარლამენტარებს, სასულიერო პირებსა და "სამოქალაქო საზოგადოების" აქტვისტებს გამოადგებათ.

გალდავა და კუპრაძე აღნიშნავენ, რომ წიგნში ამერიკა ლუციფერადაა წარმოჩენილი, საუბარია კონსპირაციულ თეორიებზე და ანტისემიტური ნარატივითაა გაჯერებული.

• "ანტისახელმწიფოებრივი იდეებით, სტრატეგიული პარტნიორების წინააღმდეგ, ყველა სახის ფობიის და შეთქმულების თეორიის შიგთავსით და გვირიგდება ჩვენ… ვინ დგას ამ წიგნის უკან?", — წერს გალდავა.
• დეპუტატი, ასევე, რუსულ ჰიბრიდულ საფრთხეზე, დეზინფორმაციაზე, პროპაგანდასა და "ტვინების რეცხვის" მცდელობაზე საუბრობს და აღნიშნავს, რომ წიგნების დარიგება საკანონმდებლო ორგანოს შეურაცხყოფაა.

რას ამბობენ პარლამენტში: პრესსამსახურში აცხადებენ, რომ ისინი არასდროს არიგებენ წიგნებს და ეს ავტორმა, ალექსანდრე ქოჩიაშვილმა თავად გაუგზავნა.

• "ფოსტით მოვიდა საქმისწარმოების დეპარტამენტში და თანამშრომელმა გადასცა ყველას, ვისი სახელი-გვარიც იყო მითითებული, არამხოლოდ ოპოზიციას, უმრავლესობის წევრებსაც."
• ეს მაშინ, როდესაც რუსული კანონის საწინააღმდეგო აქციაზე თაბახის ფურცლებსა და ფორმატის ქაღალდებზე დატანილი საპროტესტო წარწერები მედიის წარმომადგენლებს საკანონმდელო შენობაში არ შეგვატანინეს და ჩამოგვართვეს.