ინფორმაციას ტელეგრამზე დოჟდის საინფორმაციო სამსახურის უფროსი ავრცელებს.

რატომ არის მნიშვნელოვანი: ეს პირველი შემთხვევა არ არის, როდესაც საქართველოში არ უშვებენ ან შემოსვლისას აბრკოლებენ კრემლისადმი კრიტიკულად განწყობილ რუს ჟურნალისტებს.

  • მაგალითად, გასული წლის მარტში საქართველოში არ შემოუშვეს დოჟდის სხვა ჟურნალისტიც.
  • ასევე აქამდე არ შემოუშვეს რუსი ფოტოჟურნალისტი ვასილი კრესტიანინოვი, რომელიც Associated Press-სთან და The Insider-თან მუშაობს.
  • კიდევ ბლოგერი, რომელსაც რუსეთში შინაპატიმრობა ჰქონდა მისჯილი.
  • არაერთხელ გავრცელდა ინფორმაცია რუსი ოპოზიციონერი პოლიტიკოსებისა და აქტივისტების არშემოშვების შესახებ.
  • ამავდროულად, საქართველოს სტუმრობდნენ და უპრობლემოდ შემოვიდნენ რუსი პროპაგანდისტი წამყვანები.
  • რუსეთში კრიტიკულად განწყობილ ჟურნალისტებს, პოლიტიკოსებსა და აქტივისტებს კრემლი დევნის, განსაკუთრებით კი მას შემდეგ, რაც რუსეთი უკრაინაში შეიჭრა და ომი დაიწყო.

ეკატერინე კოტრიკაძე სოციალურ ქსელში წერს, რომ ჟურნალისტი ალექსანდრა შევჩენკო საქართველოში მიზეზის ახსნის გარეშე არ შეუშვეს და თვითმფრინავში გააბრუნეს.

ტელეკომპანია დოჟდი განცხადებას ავრცელებს, სადაც ნათქვამია, რომ თბილისის აეროპორტში, სადაც ჟურნალისტი რიგიდან გაფრინდა, საზღვარზე დააკავეს.

  • ნახევარი საათის შემდეგ კი მას აცნობეს, რომ საქართველოს კანონმდებლობით გათვალისწინებული სხვა მიზეზების გამო ქვეყანაში არ შეუშვებდნენ.
  • ტელეკომპანია ამბობს, რომ მანამდე ჟურნალისტი თბილისში, დაახლოებით, ერთი წელი ცხოვრობდა.
  • ამბობენ, რომ ომის დაწყებიდან უფლებადამცველებს და ჟურნალისტებს რეგულარულად აეკრძალათ საქართველოში შესვლა.

On.ge დამატებით დეტალებზე პასუხს შინაგან საქმეთა სამინისტროსგან ელოდება.